探熱針
王晶新女林莉嫻 片場癲叫要返屋企
王晶幫大台監製千王劇《群英會》正在深圳開工，除佘詩曼、馬國明、高海寧等無綫花旦小生外，他又安插晶女郎文凱玲，鍾采羲演出，其中愛將 33B林莉嫻（ Leslie）更有機會孭重飛跟謝賢飾演兩父女。不過開工第一日， Leslie不單頻食 NG，更失控發癲大叫要返屋企，最後惟有臨時換人，由沈卓盈頂上。
方寸大亂
新劇上月在深圳開工，劇中飾演謝賢女兒的林莉嫻亦陸續入組，據了解，第一日開工，跟楊明有對手戲的她突然失控，在片場大叫，目睹的工作人員都被嚇到方寸大亂。
「比起拍《鴨王 2》時， Leslie瘦咗成個碼，佢嗰日出現片場已經冇乜精神，第一場同楊明嘅對手戲頻頻 NG，講兩句對白都 NG咗二十幾次，講極都講唔到，楊明知佢係新人，都好有耐性教佢，係咁叫佢唔好緊張，但 Leslie都係做唔到導演要求，一個鏡頭拍成粒鐘。」工作人員透露。
一日貨仔
模特兒出身的林莉嫻，拍《鴨王 2》被王晶睇中，繼而力捧再演新劇《群英會》，雖然有報導指她因戲屎被老豆謝賢嫌棄，其實開工只有一日的她，跟楊明做完第一場戲已經被叮走。
「 Leslie講唔到對白之外，其實最恐怖係佢情緒失控，不斷喺現場嗌要即刻返屋企，大家都唔知佢發生咩事，淨係聽到喊聲，後來愈睇愈唔對路，就索性停拍，叫人送佢走。不過楊明就真係俾佢嚇傻，大家覺得唔可以唔處理，當晚即刻開會，因為驚佢之後嘅情緒未搞得掂，所以決定換人。阿佘嗰日唔喺度，但事後知道都好驚，事關大家都話佢好癲。如果拍到一半又發生咁嘅問題，就好難再換人。」工作人員透露。
沈卓盈執二攤
本來在劇中飾演奸角的沈卓盈，臨時易角頂替林莉嫻做乖乖女，戲份亦相對加重，她急不及待在微博 po相。
「沈大師本來個角色好唔討好，都係做勾引男人嘅壞女人，戲份又唔多，而家冷手執個熱煎堆，佢梗係開心，所以喺片場好風騷，加上謝賢都冇架子好易話為，佢哋兩父女嘅戲份拍得好順暢。」工作人員透露。
撰文、攝影、攝錄：娛樂組
|
鍾意就快D Share啦！
|
|
|
