娛樂偵訊
睇中羅天池 台妹被騙三十萬
以舊劇《愛•回家》「阿登」一角被網民留意的羅天池，雖然不及「馬壯」黎諾懿靚仔，但佢憑住幾分帥氣及健碩身形，又因為知名度不算高，反而成為騙徒利用的目標。由去年至今，被盜用相片借殼，在中台兩地騙財騙色。
結果一名台灣女子因羅天池「美色」，墮騙局被騙走 30萬台幣。得悉被騙徒盜殼的羅天池亦報警求助。
台灣妹睇中
今年三月，有粉絲發現羅天池的相片被盜用在內地相睇平台《珍愛網》，以「偉仔」暱稱覓食溝女，還寫上：「如果讓我在這裡遇見你，會不會是個奇跡！曾經無數次幻想過未來另一半的樣子……」
原來去年羅天池已多次被騙徒盜用其生活照，借殼在社交網以不同身份呃女上釣。去年八月，一名台灣女子就因被羅天池的外形吸引，誤信騙徒訛稱叫「楊懿」，任職證劵行而中招，最後被騙 30萬台幣（約港幣七萬元）。
報警求助
發現被騙後，台女才如夢初醒，隨即在網上追兇，抽絲剝繭誓刮冒認的「楊懿」，她憑騙徒曾甫出一張羅天池與籃球隊員的合照，從球衣印有的球隊名字追尋下，終於知「楊懿」的真身叫羅天池，是香港藝人。台女隨即透過微博私信羅天池，由追兇變成追星，告之他被騙徒借殼騙財騙色。無端端做咗騙徒，羅天池有感事態嚴重，在去年九月往北角警署報案。
被騙徒睇中，冒認他呃女錢，羅天池說：「希望之後多啲人識我，唔想再有人受騙。佢哋（騙徒）都好高調咁用我個樣去呃人，仲要呃錢，太過分。我都有叫受害者快啲報警求助。」
羅：點解成日都係我！
不過羅天池去年報警至今八個月，警方仍未有任何行動，今年三月他再被騙徒盜用身份呃人，令羅天池相當無助。「我追問過警方，佢哋話網絡嘅嘢好難查，啲 fans又俾人呃咗錢，好慘嘛！我真係『幾好彩』，成日都係我！」
台女雖墮騙局，卻因而認識羅天池真身，竟然為此開心番晒，並說：「能聽到你本人的聲音，我真的很開心……我也開心這個世上真有一個你，我會去找你的作品出來，好好看一遍去熟悉你。」睇嚟對方超級戀慕羅天池！一單騙案，羅天池賺咗個粉絲。
撰文、攝影、攝錄：娛樂組
|
鍾意就快D Share啦！
|
|
|
