雖然藥物可理順腦部思維，但病人仍要靠自己努力去改變想法及生活習慣，例如寫便條來提醒自己要完成的工作。
壹路健康
無法集中 個性衝動 不幸人生由此起
人生路不順，你以為是命運使然？如若追溯童年經歷，可能已經有跡可尋，一切都是腦袋出了問題。李小姐唸幼稚園時，性格比別的孩子衝動，曾為了搶奪山楂餅而咬同學，又試過在走廊失控跑圈而暈倒，可是家長和老師都沒特別注意。此後成長，李小姐自覺沿路滿是挫折，終於在三十二歲因抑鬱症求診，才由醫生解開半生疑團。
李小姐求學時，儘管明白老師所教與課本的內容，但腦裡彷彿常有嘭嘭聲，令她無法清醒地整合，導致成績與能力不成正比，從小已經充滿挫敗感。她長大後投身傳媒界，縱有諗頭，但寫稿時只得概念與枝節，欠缺主幹，無法流暢地以起承轉合的方式表達內容，拖延很久才能完成。「我好想寫好份稿，但時間唔夠，因為我難以將資料按先後次序排列。」李小姐每次寫稿，開頭總有很多想法，但難以專注完成，結果虎頭蛇尾，上司亦覺得她在「揼波鐘」。「第一次打工時，上司吩咐我將要做嘅事情寫喺便條，貼喺電腦，我仲唔知自己有咩問題。」加上記者這行人手不足，李小姐常常一個人頂三個人的工作，令她更感難以應付。
腦不停轉常失眠
本來李小姐性格感性，有次她採訪一個賺人熱淚的故事時，竟然沒有半點感覺；終於在男朋友的鼓勵下，她決定向精神科醫生求診。「醫生話我係抑鬱症，但佢追問我過往經歷後，先發現我係專注力不足及過度活躍症（ ADHD），而抑鬱症係 ADHD嘅共病。」在醫生安排下，李小姐先處理抑鬱症，再服用專注力不足的藥物。「以往我必須飲咖啡才可以集中精神，食藥後已經唔需要咖啡。工作時精神比以前集中，可以次序分明咁處事。而且我好清楚自己需要乜，唔再拖延時間。」李小姐從前常常不開心及哭泣，無法自制。「腦不停咁轉，令我無法安靜，經常失眠，依家再無咁樣。」
知道問題根源後，李小姐除了積極接受治療，同時銳意改變生活。「大半年前我開始禪跑，每次打坐後才跑步。雖然生活仍有麻煩事，但禪跑可以幫我忘憂。」控制好 ADHD後，李小姐的情緒穩定了許多，就算遇到困難，都可堅強面對。「最近幾個月已經毋須覆診，可以自己處理情緒。」回想從前，李小姐對未來只能得個諗字，無從入手；現在她頭腦清晰了，對人生可以有更多規劃。「雖然覺得自己好遲先起步，但最重要係能夠糾正行為。」精神科醫生傅子健是李小姐的主診醫生，他指醫學界從前認為 ADHD是兒童病，後來發現有三分二病人的症狀持續至成人。「過往十年，愈來愈多人關注成人患者嘅問題，直至二○一三年，美國嘅《精神疾病診斷與統計手冊》先確認成人 ADHD係疾病嘅一種。」
難跨過中年危機
據統計，每一百人之中，就有四點四個是 ADHD病人，而成人患者當中，接近半數僅有專注力不足，三成有過度活躍，剩下的兩成是混合專注力不足及過度活躍。「要為成人患者斷症，首先要確定症狀係十二歲前已經持續出現，唔係長大後突然發生；求學時亦有好多問題，例如跟唔上進度或者脾氣暴躁，為生活帶來影響。」傅子健醫生表示，成人患者通常在兩個階段最易察覺不妥，第一個是畢業後投身社會，因症狀導致工作表現低下；第二個是踏入中年，病人與伴侶關係出現裂縫，事業上沒有一技之長，讓他們自覺一事無成。有些病人怕悶，所以愛飛車或賭博，追求短暫刺激；亦有病人因事事不如意而抑鬱或焦慮，於是以酗酒來逃避問題。「不過，唔係所有 ADHD病人都失敗，歌手 Robbie Williams、喜劇演員占基利，同埋美國奧運游泳金牌選手菲比斯，都係代表人物。」傅子健醫生解釋，運動員或演員等無時停的工作，便適合 ADHD病人的屬性，可以如魚得水。
藥物是一線治療方案，可平衡腦部多巴胺及去甲腎上腺素，有助改善病人衝動、過度活躍及專注力不足的症狀。「藥物好似水泡，可幫助病人游水，但長遠我哋希望病人可以放低水泡，培養出好嘅習慣嚟應付生活。」傅子健醫生的意思是，病人在服藥時要自覺地進行改變。「兒童病人未定性，仲可以教佢哋正確嘅行為習慣，但成人患者已有一套價值觀，需要用長時間去改變。」在日常生活中，病人如能認清限制，便可以各種方法跨過界限。「我成日教病人用技巧彌補缺陷，例如校鬧鐘、手機提醒功能同埋用便條提醒要完成工作。明知自己專注力不足，可將工作斬件進行，逐少達成目標，防止過早放棄。」傅子健醫生說，病人亦可將病況告知親朋密友，讓他們知道自己的限制，多加諒解。「以前大家以為 ADHD病人係懶惰或者大頭蝦，其實即使係成人患者，都可以獲得有效治療。如果自細就覺得做事有心無力，都可以向醫生求助，了解係咪腦部惹的禍。」
拖慢進度招人厭
精神科醫生曹國柱亦指出， ADHD病人在童年時，相對地沒那麼大壓力，然而投身社會後，便易被複雜的工作及人際關係影響，顯露出專注力不勝負荷的情況。「細路做功課慢係個人的事，但喺講求合作嘅職場，病人會拖延成 team人嘅進度，容易招致上司同埋同事不滿，影響關係。亦有病人無法控制衝動，所以表現倔強，稍有不滿就發脾氣。佢哋為咗集中精神，亦成日依賴飲咖啡同食煙。」不只工作，在戀愛、家庭及社交中，病人都可因為症狀而令旁人誤解。「病人無法忍住衝動，可能對伴侶衝口講出傷害性說話，或因情緒失控而嗌交，亦經常忘記應承伴侶嘅事，導致關係受損。」
ADHD病人絕不愚笨，曹國柱醫生形容，他們的腦袋就像崩缺了的碧玉，從小到大都充滿莫名的遺憾；雖然藥物及認知行為治療可以改善症狀，但 ADHD病人如能盡早發現問題，提早接受治療，便可減少 ADHD對個人發展的損害。「如果兒童病人嘅專注力低至無法應付功課同學習，已屬病態，家長必須正視。集中力係腦部功能嘅一種，有啲病人喺青少年期，專注力嘅發展猶如搭上尾班車，可以趕上進度，長大後就能夠應付生活及工作需要；但有啲病人專注力發展遲緩，成年後專注力就較別人遜色。」
撰文：王家瑜
攝影：鄭樹清
features@nextdigital.com.hk
|
鍾意就快D Share啦！
|
|
|
