豪語錄
我們最幸福 鄭希怡
鄭希怡（ Yumiko）唱過什麼歌、演過什麼戲，都不再重要了。她的 instagram比星途燦爛，好友簇擁，夫妻和睦，女兒可愛。幸運嗎？「好唔好彩，好難界定。如果 focus喺某啲事件，啲人覺得我唔好彩； focus喺家庭，我咪好彩囉。」
撇除在台上發生的「某啲事件」，鄭希怡的黑仔事跡，還有一二年在布吉為應采兒賀壽，二人危坐泳池邊影相，不幸失足。壽星女僅擦傷少許，鄭希怡卻由三樓直墮山坡，導致頸椎移位，差點全身癱瘓。離奇，卻正中托爾斯泰的名言：幸福只有一種，不幸有千百種。
幸福本應簡單，當事人活得高興就是了。「我覺得 OK嘅，當然所有嘢都仲可以好啲。」遺憾曾受力捧卻沒有大紅？「如果成世人不斷要同人比較，咁就慘了。所以我唔會咁去比……反而係我嘅人生中可以完成到什麼使命，第時有個好好的回憶？」那你的使命是什麼？「我仲諗緊。」
不是說活到三十五歲就要一片澄明。但鄭希怡究竟是睇化了，對世事萬物皆無所謂，還是步步為營得有口難言？
分身
鄭希怡有兩個人氣高企的分身。一是她的寶貝女兒，另一個容後再談。剛滿一歲的梁浸浸（乳名）眼仔碌碌，天生一副頑皮相，找她開工的廣告商眾多，只是阿媽暫時未捨得讓她做童工，「鬈髮似我細個時。」翻看她的童年照，根本是餅印。新手父母都是狂熱分子，若孩子跟自己不相似，心中難免戚戚然。然而做爸爸的也不必呷醋，「佢好硬頸，我叫佢嗌媽媽，佢就一定嗌爸爸。可能都要有人治吓我。」鄭希怡自言愛自由、不受拘束，報應來得快，「性格唔好似我，我想佢聽話啲。」
其實女兒對她的整治，未出世時已經開始，生 BB對鄭希怡來說，本身就是一宗意外。「我根本唔鍾意小朋友、唔識照顧小朋友。」現時她的生活由女兒主導，加上身邊友伴陸續榮升人母，過往的船 P、泳池派對，已變成兒童樂園，「以前我好怕去小朋友的生日會，留唔到半個鐘一定要走。一有超過五個小朋友喺你面前跑、叫，實在太可怕！」上個月，她首次為女兒搞生日派對，算是踏出了新的一步，「我以前覺得啲媽媽喺傻嘅。佢笑啊、佢識行路啊！個個都會㗎啦。但自己經歷過，真係好開心喎。」
她有理由高興，因為梁浸浸的進步比一般小朋友更大，「出世時呼吸系統有問題，唔識自己抖氣；心臟有個窿，大過 5mm。」一出世，便要轉送東區醫院深切治療部，瞓氧氣箱，留下鄭希怡一個在港安醫院，「嗰幾日我係好唔開心。好多媽咪生完住喺醫院，都有時間同小朋友相處。但我生完佢，見咗一面，就送咗去 ICU，見唔到佢又擔心。都有少少覺得，點解會咁㗎？」以往發生的種種意外，都不足以令她有「何必偏偏選中我」的感嘆，唯獨女兒抱恙，才有切膚之痛。
如是者餵奶又要餵藥，持續了接近一年才宣告斷尾。嗜甜是天性，但梁浸浸竟然不畏苦，「用少少奶溝開啲藥，佢每次都飲晒。」心漏亦已自行修復，不用做手術。「我好好彩，佢好少喊、好快一覺瞓天光、又好鍾意食嘢。」有媽的孩子像個寶，「我媽咪有幫我手，我又唔係太辛苦。」鄭媽媽溫柔賢淑，「而家見到佢點照顧我囡囡，就知佢以前點照顧我，我會更加尊重佢。」
意外
英皇的大花小花，有頗多來自單親家庭，後來飛黃騰達的情路也大多坎坷。他日若有姊妹出閣，鄭希怡大有資格充當好命婆。人生由意外組成，她應該知之甚深。她與老公梁學儲（ Andy）之所以會結婚，其實也多得布吉那宗意外。二人一起至今逾十年，從來不會檢查對方的手機，「我哋兩個都好鍾意自由。一早傾過唔需要結婚、生小朋友，只要開心就得。可能有啲嘢發生咗，先知關係原來比想像中穩固，可以大膽啲、行多一步。」
意外的成因頗寃枉。鄭希怡與應采兒擒上在泳池邊的木牆影相，懶理木牆後面就是山坡。就像前年有一名自由行在海洋公園，坐在欄杆仰後跌死——不幸冇命是為悲劇，大難不死是為滑稽。鄭希怡如今冇穿冇爛，但臥床期間，身邊人卻被嚇個半死，「清醒嘅人最痛苦，我自己好幸福，好似瞓着咗咁。」她昏迷兩日，其間友人打了無數電話、搵醫生，「手術後我喺布吉住咗兩星期，成班朋友都留喺度陪我。丁丁（應采兒）每日寫字條，攝入房俾我睇、鼓勵我。」男友卻不擅於浪漫，「佢一直都喺病房陪我，冇返過酒店，瞓喺梳化。」他身形高大而梳化短小，心中可怯慌？「佢唔會講，但我知道。」回港後，二人訂婚。
瓊姐
鄭希怡的另一個化身，是「高登天后瓊姐」，又名「慈雲山鄭列瓊」。瓊姐在網上人氣高企，常以容祖兒死忠粉絲的姿態出現，挖苦、攻擊其他公司的女歌手，絕不手軟。由於文風抵死，偶爾突破盲腸，獲得十多萬網民追隨。「其實我好想問佢，點解用我真名？」傳說瓊姐的本尊就是霍汶希（ Mani），直接問她不就是了？「真係㗎？我唔知喎。不過佢應該係同英皇幾近嘅人。」 Yumiko在上海出生，十歲來港，在慈雲山唸書。在嘉欣嘉儀當道的年代，列瓊被歧視，「被同學笑我係大陸妹。當時係有唔開心，我唔知可以講乜去反駁，因為我好似又真係。一段段嘅經歷，令我冇咁介意一啲唔好聽的說話。」
細路適應力強，來港一年，上海瓊的廣東話已相當流利。但成年後要面對的種種，卻沒那麼容易釋懷。她去年約滿英皇，結束長達十五年的賓主關係。現任經理人建議不要重提昔日的尷尬意外；不要拿舊同事的成就來比較，因為她與英皇的關係仍然很好，說三道四便顯得「反骨」云云。前者值得諒解，但後者嘛，江湖嘅事，我識真係條鐵。
且讓時間回到千禧年，鄭列瓊跟陳潔靈學唱歌，獲推薦去英皇跟老闆見面。同日簽約的有阿 Sa，「阿嬌遲我哋少少。公司有諗過將我擺入 Twins度，但高度、各樣嘢都唔同，好快就打消呢個念頭。」「我又唔係好玉女，個樣又唔係話好有性格。未諗到定位，頭兩年都冇乜嘢做。咁我嘅價值喺邊呢？」直到蔣雅文、劉思惠出現，三人組成 3T。 3T十蚊一注，但要三場都估中三甲誰屬，殊不容易。英皇改買鄭希怡一注獨贏，然而經過一輪力捧，到○八年她已沒有正式出碟，餘下的合約漫長，難免忐忑，「嗰時諗，應唔應該繼續做呢行？係會有好多問號。」可有答案？「答案係唔好諗咁多。唔出唱片，咪拍戲囉。」
接着幾年，她主力在大陸拍劇，「對好多香港人嚟講，係放逐，但我完全唔覺。拍拍吓就搵到樂趣。」不曾掛念在台上做主角的日子？「還好。未入行前真係好鍾意唱歌。入咗行，發覺唱得好過我的人好多。又冇覺得好可惜嘅……」自覺天分如何？「唔，其實我到而家靠的都是天分，所以都 OK，哈哈。」去向未明時，公司可有回應？「如果呢啲嘢可以出街，我會寫本書，哈哈哈。」
自由價更高
愛情誠可貴。既然鄭希怡早已袋袋平安，仰望自由，也是很自然吧。訪問期間，她講得最多的是「自由」：「我老公比我有耐性，俾到好多自由我。」「我好享受而家呢個狀態，好舒服，好自由，可以做自己鍾意嘅嘢。」
文明的國度不會周街掛滿文明標語。鄭希怡做了十五年乖學生，囚鳥出籠不太習慣。談到工作、志向、舊公司，她通常都以「幾好」、「 OK」或「哈哈」帶過。如果對話可用 emoji代替，應該會順暢得多。
為免強人所難，還是談談梁浸浸好了，父母都習慣把自己喜歡的，加諸兒女身上。鄭希怡自小苦學彈琴唱歌芭蕾舞。同學太多， friend子太少，她不想女兒重蹈覆轍，「好多家長都好緊張，我唔要咁。我自己都唔係讀名校，都 OK吖。」「我覺得女仔唔需好叻，但我要佢好識得思考，享受自己的生活。」她早前帶女兒去布吉，體驗她至愛的陽光與海灘，「我估佢都會鍾意。」總之不要跣腳就好。
撰文：蔡慧敏
攝影：葉志明
攝錄：黃志明
服裝： Kate Spade、 Kevolie
化妝： yanchiu@ndnco.co
髮型： Sing Tam@pi4.hk
|
鍾意就快D Share啦！
|
|
|
