掃呢頁CODE去手機

2016年5月12日 星期四

「治癌女博士」搞 40+ 獲獎名人變顧問 [壹週刊 - 1366] __,癌,治癌,M1,

趙淑儀(中)涉嫌聲稱可透過紅外線、磁石及吸氧等療程,治療奇難雜症,但兩名癌症病人因病情惡化去世。佢上星期三涉嫌串謀行騙被捕,之後獲准保釋。眾人諸事「治癌女博士」搞40+ 獲獎名人變顧問最近一宗美容院「治癌騙局」,令公眾譁然。女博士趙淑儀聲稱創出活化大腦療法,可醫治癌症,涉嫌呃咗七名受害人總共五百萬,上星期被捕,月尾要返警署報到。趙淑儀(黃圈)有份創立的40+協會,四年前舉行典範頒獎典禮,陳祖澤(紅 ...


趙淑儀(中)涉嫌聲稱可透過紅外線、磁石及吸氧等療程,治療奇難雜症,但兩名癌症病人因病情惡化去世。佢上星期三涉嫌串謀行騙被捕,之後獲准保釋。

眾人諸事

「治癌女博士」搞 40+ 獲獎名人變顧問

最近一宗美容院「治癌騙局」,令公眾譁然。女博士趙淑儀聲稱創出活化大腦療法,可醫治癌症,涉嫌呃咗七名受害人總共五百萬,上星期被捕,月尾要返警署報到。

趙淑儀(黃圈)有份創立的 40+協會,四年前舉行典範頒獎典禮,陳祖澤(紅圈)及高志森(後排左一)均有出席。(互聯網圖片)

趙被指多年來透過教會,甚至大學搞講座宣傳同識人。記者發現,佢有份創立嘅慈善團體 40+協會,顧問成員大有來頭,都係政、商及娛樂界名人,包括行會成員陳智思、前賽馬會董事局主席陳祖澤同演藝人協會前會長曾志偉等等。

記者向一眾顧問查詢,陳智思回覆話,唔知做咗該會顧問,相信同幾年前獲 40+頒獎有關,佢又話同趙唔熟,只係見過面傾過偈,「唔知佢做咩工作。」福堂集團執行董事司徒永富話「唔係好知呢件事,可以問吓其他人」,匆匆收線。導演高志森透過助理得悉記者查詢後,都無回覆。

本刊又發現,該會旗下 40+典範圓桌會,成員仲包括發展局長陳茂波,佢透過新聞秘書回應,一○年接受 40+頒發獎項,之後好少參與該會活動,同趙淑儀並

唔熟。

趙淑儀遭各界劃清界線, 40+協會週一發聲明指,佢辭任會務工作主席一職。到底佢人脈有幾廣,大家自己諗諗,但連佢個會都同佢割席,都幾慘慘豬。

陳曦齡專業失德 照獲 40+表揚

陳曦齡三年前被醫務委員會裁定專業失德,去年獲 40+協會頒獎表揚。《蘋果日報》圖片

本刊研究過 40+協會網頁,其實都唔係好知協會主要工作係乜,但該會每年會舉行一次典範頒獎典禮,表揚社會上 40歲以上傑出人士。舊年有七人獲獎,包括香港話劇團藝術總監陳敢權、撒瑪利亞防止自殺會主席黃祐榮、港大畢業生議會主席溫頌安同維特健靈董事長陳曦齡等。

陳曦齡係歌手陳美齡胞姊,亦係西醫。○六至○七年,佢當時無註冊專科醫生資格,但兩度喺文件自稱「兒科及過敏專科醫生」,三年前被醫務委員會裁定專業失德,停牌一個月,緩刑六個月。協會網頁無交代七人值得表揚之處,但照咁睇,趙淑儀今次只係涉及醫療騙案,將來都可能有機會獲獎。

震雄兼職百萬年薪 曾偉雄蔣家的「特殊關係」

震雄業績不算理想,由主席起一眾管理層要減薪應付寒冬,但同時以百萬年薪聘請曾偉雄做兼職。

前一哥曾偉雄小學雞玩捉字蝨,去震雄集團做管理顧問,唔承認係從商,話冇違反退休前「不會從商」嘅講法,但收百萬年薪仲只做兼職,呢啲筍工香港數百萬計打工仔真係恨唔到,之但係,震雄集團過去冇咩聘請退休官員做高層,咁今次點解「慧眼識偉雄」?

原因之一唔通係曾偉雄有亮麗學歷同管理經驗?但佢公開學歷中,只有「曾在美國哈佛大學修讀管理發展課程」係同管理有關,但呢個係課程而唔係碩士資格,佢服務警隊時管理人事亦唔見特別出色,係咪值百萬年薪先?

蔣震(左三)四女麗莉(左四)涉及太平洋興業案○一年三月開審,庭上出現疑似偽裝警方調查文件,但事後未有人被捕,當時剛上任做一哥嘅曾偉雄,未知有沒有下令要查個水落石出呢?《蘋果日報》圖片

反而睇番曾偉雄○一年一月十一日正式做警務處處長後,就真係有件事同蔣家有關,當時蔣震四女蔣麗莉涉欺詐案開審,辯方庭上忽然呈上三份聲稱警方調查文件,指案中特赦證人曾兩度涉嫌藏毒被捕,但一日之後控方話證實文件造假。

雖然有人涉及違法行為,警方更被擺上枱,但蔣麗莉最終罪成入獄,事件亦不了了之,唔見有人被調查同拘捕,唔知當時做咗一哥冇耐嘅曾偉雄,又有冇落柯打要嚴查同睇吓警隊內部有冇人參與其中呢?

李家仁 fb撐 689 「好」「勁」

呢排唔少人睇 689嘅 facebook,都發現一個怪現象,每逢佢出 post,兒科醫生李家仁通常都會留言支持,頻密程度隨住下屆特首選舉臨近而愈嚟愈高。不過呢位梁粉嘅挺梁方式有少少騎呢,只係重複咁話「好」、「勁」,同 689個 post嘅內容無乜直接關係。

記者問過李家仁醫生,佢話係想表示支持現任特首,但唔想淨係㩒 like個掣,覺得要打埋字出嚟支持,仲話對其他朋友都一樣係咁,又話最近多咗上 facebook,所以打多咗留言。如果 689競逐連任嘅話,佢話多數會支持,睇嚟佢揀特首同留言都一樣係咁盲目。對連任困難重重嘅 689嚟講,有票最緊要,支持者騎呢少少都無所謂。

李家仁有時連「好」、「勁」都唔寫,乾脆貼呢張相上梁振英 facebook,真係百分百梁粉。

李家仁用埋同 689嘅合照做 facebook大相。

撰文:巫不言

news@nextdigital.com.hk


鍾意就快D Share啦!