雖然熱到吹住風扇仔，阿 Kay見到個仔就笑晒口！
探熱針
俾鄭嘉穎杯葛 謝安琪心淡 陪仔踢波
四月完成兩場演唱會後，謝安琪即宣布停工，有份拍的《殭》播得如火如荼，同男主角鄭嘉穎更一早不和，上週五（ 6/5），鄭嘉穎請《殭》演員在渣甸山慶功，被杯葛無份出席的阿 Kay，亦寧願陪仔玩。
跟得阿媽
已開始停工的阿 Kay，擔任女一的《殭》播得如火如荼，上週五（ 6/5），男一鄭嘉穎吹雞請全劇演員慶功，曾被指掛住追陳凱琳冷待阿 Kay，鄭嘉穎今次請客亦無預阿 Kay。
連日來都黐住個仔，快將九歲的張瞻，本身就有唔少同學仔朋友，不過，阿 Kay亦樂於做跟得媽媽，會黐埋仔仔和其他同學及家長聯誼。
上週六（ 7/5），下午一時許，謝安琪親自駕車，同奶奶一齊送囝囝去樂富學踢波，戴住頂草帽的阿 Kay，依然化行妝，陪足阿仔踢波個半鐘，阿 Kay都準備充足，帶定飲品和風扇仔，同奶奶坐埋一邊睇，活躍的張瞻，不時和其他小朋友傾偈，似乎是初學階段，張瞻交波經常交甩，阿 Kay仍顯得好緊張，不時用手機拍下囝囝風姿。
陪阿仔踢完波，另外有約的阿 Kay，獨自駕車離開，張瞻就跟阿爺嫲嫲返屋企。
全部泡湯
去年十月宣布會大搞入行十周年世界巡迴的謝安琪，大半年來，都只舉行了一場澳門演唱會及兩場香港演唱會，其他地方全部泡湯，的確令謝安琪心灰意冷。
「話晒入行十年，阿 Kay本來對呢個世界巡迴演唱會好有寄望，不過，星馬、澳洲同美加傾傾吓都全無下文，就連內地演唱會，亦攞唔到批文難產，阿 Kay係好唔開心，因為咁亦壓力好大！」
近年經常辣火頭的謝安琪經理人夏森美，早於阿 Kay出道時已開始合作，不過，合作十年，意見分歧亦日深。
「阿 Kay離開星煥之後，自組製作公司邁亞音樂，呢間公司周博賢同夏森美都有份，本來香港演唱會，都有其他製作公司傾話做主辦單位，好似新娛國際、太陽娛樂咁，仲一簽可包幾場合約，但夏森美唔鍾意俾人話事，更認為肥水不流別人田，所以自己攞返嚟搞，又唔肯分餅仔俾其他單位協辦，點知傾贊助傾到一鑊泡，最後更因為宣傳唔好，由原先計劃開五場變咗得兩場，相對事業高峰期嘅七場演唱會，簡直跌晒 watt，最慘係連累公司蝕錢！阿 Kay先咁心淡！」
唔再續約
見世界巡迴出晒事，將於今年七月約滿經理人公司 Ban Ban Music，謝安琪決定唔續約。
「 Kay就嚟約滿， Sammy Ha都『 chur』得阿 Kay好盡，幾個月嚟為咗唔續約， Kay決定停工休息，等合約滿咗先再打算。」
合約多糾紛
謝安琪決定飛起合作超過十年的經理人夏森美，選擇停工等合約滿。其實，這十年來，阿 Kay都有唔少合約糾紛。
2006-2012
加盟新藝寶唱片、唔夠一個月的謝安琪發現未婚懷孕，並休假半年，唱片公司全面配合， 08年更憑《囍帖街》大受歡迎，事業創高峰，不過，被公司捧成一姐後， Kay 12年便秘傾星煥娛樂，最後和新藝寶解約收場。
2012-2013
與新藝寶唱片不歡而散解約後，並以 160萬轉投星煥旗下及賣身台灣金牌大風，簽約三年。可是到 13年，星煥與 TVB合併，成為星夢娛樂，阿 Kay拒絕加盟，自組製作公司「邁亞音樂」，最近又因合約問題鬧不快。
撰文、攝影：娛樂組
|
鍾意就快D Share啦！
|
|
|
