被撞破
莊思明單拖行去停車場上車，點知男友楊明中途會合，被撞破二人扮前後腳返港。
探熱針
吉隆坡見莊思明父母 楊明「面試」滿分
與拿督女莊思明拍拖兩個月的楊明，上星期飛吉隆坡拍特輯時，趁機跟女友回家見家長。據知，楊明「初次面試」攞滿分，並深得女方家人及朋友歡心，連未來大姨莊思敏都激讚，做拿督女婿，十拿
九穩！
即跟
熱戀情侶見少陣都唔得！早前長駐深圳拍劇的楊明，收工會漏夜飛撲返港急見莊思明，甚至當街啜爆女友，超肉緊。上星期，楊明要去吉隆坡拍特輯，莊思明即跟，與男友前後腳飛返大馬老家。
「楊明去嗰邊拍星級健康特輯，同行仲有翟威廉、唐詩詠同岑麗香，個節目係講環保，要留响當地六日，個拍攝行程唔算密，可以抽到時間陪女友返屋企見家長。」知情者說。
大姨過目
行程中，除非要開工，否則楊明都是陪住女友，寸步不離。
「莊思明帶咗楊明去同屋企人食咗餐飯，佢父母對楊明印象唔錯，大家相處得好好。除咗見屋企人，仲帶咗佢見自己啲朋友，楊明好叻講嘢，所以好快就融入到女友嘅朋友圈。」
據了解，和楊明一開始拍拖，莊思明已帶男友和莊思敏見面，讓大家過目！
「莊思敏覺得楊明對自己細妹好細心，仲讚佢個人好又有耐性，其實佢唔想個妹再同陳司翰翻撻又翻撻，所以好贊成莊思明同楊明一齊。」知情者說。
趕上深圳
上週六（五月二十一日）晚，莊思明十點幾返到香港，但未有和楊明一齊出閘，被問到有關帶男友返吉隆坡屋企見家長，她說：「我自己放完假返嚟，有同屋企人食咗餐飯。」
往停車場途中，楊明終於現身合體，問二人為何分開出閘，莊思明搶答：「怕咗你哋（記者）。」楊明則補充：「攞行李。」
「（咁快見家長，會唔會今年結婚？）應該唔會咁快嘅。（女友爹哋鍾唔鍾意你？）咁要問佢喎！問 uncle啦。（咁你覺得佢對你嘅印象好唔好？） OK嘅！」楊明笑着說。之後，兩人分開車離開，楊明更由機場直接到皇崗口岸，過境返上深圳，歸隊繼續拍電視劇《群英會》。
撰文、攝影、攝錄：娛樂組
|
鍾意就快D Share啦！
|
|
|
