無綫繼兩年前製作微電影《愛情來的時候》，今年再接再厲走遍德國、台灣實景拍攝，邀來佘詩曼、馬國明、黃翠如、周柏豪等孭飛的網絡電影《愛情來的時候2》，除了延續上集阿佘及馬國明的「女尊男卑」愛情故事外，亦加入翠如、周柏豪及黃浩然一段以「嫁個有錢人」為目標的戀愛。為隆重其事，無綫已安排兩個故事分別於本月28日（德國篇）及下月4日（台灣篇）連續兩個星期六於myTV SUPER打頭陣獨家點播，由一眾男神、女神帶領你進入浪漫愛情世界！
馬路喪跑超級「甘」
「台灣篇」由黃翠如、周柏豪及黃浩然等主演，講述拜金女翠如一心想釣金龜， 與「同居」的青梅竹馬柏豪努力賺錢之餘，亦積極結識有錢人，機緣巧合下遇上高富帥「Roger」浩然，生活因此改變，浩然因翠如與已故女友似樣而對她產生愛意，此際柏豪亦終意識到自己喜歡翠如，故努力爭取，迎來開心結局。
為配合打工達人的角色，翠如與柏豪不乏賣魚妹、扮米奇老鼠等造型，翠如更放下女神形象，不時以亂髮及戙高腳等粗魯示人，監製張洪翅大讚二人肯為角色豁出去：「個故事拍得浪漫，希望帶出錢唔係萬能，貼近啲現實，初頭剪片剪咗60分鐘，但唔想冇頭冇尾，最後同公司成功申請到一個85分鐘版本出街。」對於角色不修邊幅，翠如指角色性格就如她本人，沒有形象可言，故很容易投入，即使每日拍攝長達21小時，劇組士氣仍然很高，談到一場街頭喪跑戲，她直指「甘到爆」：「嗰日係超唔夠瞓，由早跑到晚，本來仲要赤腳跑馬路，好在最終改咗踢拖，着住件晚裝又重又辛苦，仲要台灣綠燈，啲車可以轉彎，幾咁激。」
臨場加浩然電單車戲
而柏豪表示拍攝個多星期中，每日連坐車僅餘一個多小時休息，但台前幕後沒有怨言， NG也不多，更大讚翠如尊業及捱得，印象最深是二人隔着一道門說分手，全程靠聲音感受對方，並以內心戲表達心痛感覺。至於飾演有錢人的浩然被讚一穿上西裝已入晒戲，他笑指全因翠如向高層余詠珊推薦他才有份演出，眾人一到片場更即興加插他早年在電影《孤男寡女》中一場揸電單車載女主角的場面：「場戲係臨時加，導演借出私伙皮褸同電單車，我叫做圓咗翠如個心願」
|
鍾意就快D Share啦！
|
|
|
