買定離手！開呀！唔少賭仔咩都鍾意賭一餐，不過叫你賭吓邊個係你個女嘅男朋友，你仲買唔買得落手先？又或者唔少花生友，隨時都會爭住落注都唔出奇！意甲班霸祖雲達斯今季再做雙冠王，主帥阿里基個愛女Valentina都趁機爭上位，除咗成日著住波衫影吓性感相擺上網呃Like，早排仲拍埋短片唱會歌，扮晒祖記天字第一號Fans。
現年21歲嘅Valentina，擁有模特兒身材加靚靚面孔，但就仲係個學生妹，由於佢之前有個前球員男友盧巴柏，而近排又甩咗拖，有體育博彩公司眼見Valentina喺社交網持續活躍，似乎係想喺球圈搵個新男友咁款，隨即就開出盤口，賭吓邊個會係Valentina下任男友。
既然Valentina同祖記關係密切，莊家就鎖定阿里基嘅祖記愛將保羅普巴做大熱門，只得1.65倍，次熱門則係祖記射手施蒙尼沙薩，有2.5倍。盛傳會喺暑假加盟祖記嘅薩斯索羅前鋒杜文尼高貝拉迪，以及祖記同市死敵拖連奴射手比洛迪同係4倍第3熱門。再睇埋個受注名單，專撬人牆腳嘅國米「殺女王」莫路伊卡迪都有15倍，而退咗役嘅國米花花公子韋利則係25倍冷門，唔知Valentina會唔會真係鍾意叔叔呢？
來源 source: http://hk.on.cc
|
鍾意就快D Share啦！
|
|
|
