胡杏兒同老公Philip Lee(李乘德)喺舊年結咗婚，去完一個悠長嘅蜜月之旅之後，即刻投入工作，0依家又喺無錫拍劇，之後又要去上海做舞台劇，不過杏兒爭取時間同老公Philip見面。早排Philip喺ig post咗啲去台灣參加朋友婚禮兼放天燈嘅相，跟住仲post咗條老婆大人突襲婚宴送驚喜嘅片，嗰陣唔單止現場有唔少人哄，網上有好多人share條片添！估唔到呢件事竟然仲有下文！今日有周刊報道話，原來杏兒當日突襲係因為發現同行有一個富貴巨乳台女Joy做導遊，搞到杏兒好不安，所以犧牲休息時間，飛咗去台灣。身在無錫嘅杏兒，今朝接受《蘋果》訪問，佢話：「佢哋係一大班人去台灣出席朋友嘅婚禮，好明顯佢哋係成班朋友一齊去玩，唔需要太多回應同解釋咁多。Joy係我哋嘅好朋友，人哋都有老公，所以唔好亂咁寫。」講到嗰條突襲婚宴嘅片，杏兒話：「本身我都要去呢個婚禮，只係咁啱要做嘢，我哋唔會因為擔心會有啲乜嘢新聞而唔去做啲想做嘅嘢，不過冇諗過我老公會擺段片上網，總之我哋都唔會理咁多呢啲嘢！」至於佢老公Philip亦於ig貼一行人大合照澄清，仲話杏兒同Joy亦是老友，所以見到段報道之後都忍唔住大笑。最後Philip寫道:「On my side don't worry I will stay strong and not let this affect me or my friendships。」
|
鍾意就快D Share啦！
|
|
|
