2016年5月26日 星期四

終於一露 半百馬蹄露:豬扒都可以係女神! [壹週刊 - 1368] __,女神,馬蹄露,M1,

探熱針終於一露 半百馬蹄露:豬扒都可以係女神!入行28年,招牌生鬼唔係靠樣同身材搵食的馬蹄露,原來一直禾稈冚珍珠。踏入49歲,忽然勇猛激露影寫真,將收埋多年的body公開,自信十足。除了body戰鬥格,原來馬蹄露連食筍盤,前度包括曾在美國哈佛大學教數學的老外教授。由性感寫真到獵食戰績,真係估佢唔到。31A冇線照露靚女冇份!但擅演丑角,巴辣又得騎呢亦可的馬蹄露,近期忽然露真章,繼去年台慶頒獎禮性感示 ...


探熱針

終於一露 半百馬蹄露:豬扒都可以係女神!

入行 28年,招牌生鬼唔係靠樣同身材搵食的馬蹄露,原來一直禾稈冚珍珠。踏入 49歲,忽然勇猛激露影寫真,將收埋多年的 body公開,自信十足。

除了 body戰鬥格,原來馬蹄露連食筍盤,前度包括曾在美國哈佛大學教數學的老外教授。由性感寫真到獵食戰績,真係估佢唔到。

31A冇線照露

靚女冇份!但擅演丑角,巴辣又得騎呢亦可的馬蹄露,近期忽然露真章,繼去年台慶頒獎禮性感示人後,近日在女攝影師 Daphne操刀下,激罕裸露!

估唔到年近五張,仍有如此「優勢」,皮膚白滑腰幼幼,雙手遮胸玩誘惑。由丑角變成賣性感,反差大又出人意表。

因有自信,所以美麗!所以話之是名副其實的「冇線藝員」, 31A上圍平如 iPad,仍企硬唔加墊擴充,黑西裝開胸著, iPad胸冇肉冇線,但型爆!比起死谷爛谷的𡃁模,馬蹄露冇線勝有線。

馬蹄露一露,唔單只驚現線條身材,仲一晒背後有型紋身,原來近五張嘅佢係潮人。

31A冇線上圍唔構成寫真障礙,照樣打開胸口賣平實,型到爆嘅佢話:「唔一定波大先可以影靚相。」

出寫真唔使大波

馬蹄露並非受咗大刺激,才有此舉動。

當初有影相構思,因為獲中國郵政睇中,計劃出郵票及 post card。影的也只是一般靚相,但見自己狀態大勇,就把心一橫去盡啲!

「我阿媽同家姐都笑我咁嘅身材學人影寫真!唔係話咩,冇人試過平胸出寫真嘛!我想俾其他女性知道,最緊要對自己有信心,只要打扮得宜,豬扒都可以變女神,唔一定大波先可以影寫真嘅。」馬蹄露說。

十幾年前,馬蹄露已經試過打開心口,以平胸姿態影靚相。

幫馬蹄露改造的鐵三角組合,寫真攝影師 Daphne Chan(右二),髮型師 Ming Sir(左二)及化妝師 Gin Ho(右一)。

連食筍盤老外

從不看扁自己的馬蹄露,其實一直真人不露相,雖無天使面孔,卻有不尋常的「食力」。據了解,九八年跟前夫離婚後,馬蹄露不時食到「好西」,老外筍盤包括大學教授,真係估佢唔到。

「當年馬蹄露為咗幫老公打理酒吧生意同撐住頭家,由朝捱到晚,點知最後得到嘅係離婚。佢好傷,離婚後一直冇再拍拖,直至五年後,佢識咗個美籍意大利裔教授 Mark,對方喺美國哈佛大學做過研究員,而家係 Stony Brook大學數學教授,專教博士生。佢嚟過香港做訪學,經朋友介紹認識,一撻即着。馬蹄露喺老外眼中,係靚女標準,審美角度同華人唔同。嗰時馬蹄露不時飛去美國見男友,不過異地戀好難維繫,一年貨仔就冇咗。」知情者爆。

失筍盤後,再隔五年,馬蹄露又遇到另一筍盤,是個四十出頭的德國籍商人。

大學教授男友

去年台慶頒獎禮,有份角逐女配角的馬蹄露,罕有著到鬼火咁靚兼低胸,令人眼前一亮,網友大讚。

玩 Cosplay

13年,馬蹄露以 Cosplay造型谷胸上《超級無敵獎人終極篇》,一洗昔日醜女形象,令人眼前一亮。

繼續食「好西」

有關與曾在哈佛教書的數學教授 Mark Andrea拍拖一事,馬蹄露承認對方是前度。

「之前確係有老外筍盤,但分咗手。(有冇可惜?)我唔覺得,反而覺得係佢走寶,哈哈!至於之後個德國男友,一拍拖佢就講明要生 BB,我唔想,所以拍咗個幾月就分手。」馬蹄露說。

近五張仍 keep住戰鬥格的馬蹄露坦言會繼續食「好西」。

「我鍾意外國人夠高大,靚仔囉,同佢哋相處舒服啲!我成日講我唔靚啫,但都可以選擇靚嘅男朋友,我相信吸引到佢哋唔係我嘅 body,而係性格。情人眼裡出西施,寃豬頭都有盟鼻菩薩。」

去年拍《鐵馬戰車》,馬蹄露要苦撐開工,靠意志捱過年前拍劇意外帶來的創傷後遺。

入行多年,馬蹄露啲角色唔係惡婆娘就係形象騎呢,現實嘅佢其實鍾意型格打扮。

男友頂尖數學家

真人不露相的馬蹄露,其前度 Mark Andrea來頭勁,是數學家兼教授。 98年曾於美國哈佛大學任研究員,現為美國另一大學數學教授。他亦是美國數學學會百年會士,該會士是頂級數學家先可當選,其中華裔著名數學家丘成桐都攞過。

7月個唱  10月寫真

個個趕書展出寫真,但馬蹄露呢輯性感相純為試水溫作,所以不會參加𡃁模混戰。「我要拍劇,七月又要喺荃灣大會堂開演唱會,有主辦單位搵我做膽,同幾個嘉賓鄧宇昭、姜蓓莉、澄騫、鄭子誠、李霖恩一齊玩,所以十月先有時間去沙巴影寫真。我一直諗住影靚相係俾自己留念,但如果出嚟效果見得人,我唔排除搵投資者幫我出版。到時,睇吓會唔會著三點式上陣。」馬蹄露說。

形象百變

Lady Gaga

14年,馬蹄露與冼灝英合作新歌《 Lady Gaga》, MV裡馬蹄露以多個形象示人,十分出位,有網民更笑指她似邵音音。

威嚴高官

09年,馬蹄露在《畢打自己人》中飾演的琴姐,奄尖聲悶兼潑辣,睇到觀眾咬牙切齒。其威嚴造型更因為與中華人民共和國外交部發言人姜瑜酷似,成網友熱話。

坎坷奇女子

97年憑第一套劇《真情》飾演超級討厭的「 May May」彈出,無綫更破例在台慶頒獎禮特設「最厭惡角色獎」,頒給馬蹄露,此獎項亦僅此一屆(下左圖)。

本身長期受類風濕關節炎折磨的馬蹄露, 13年在內地拍《巾幗 3之諜血長天》一場坐電單車戲時,意外墮坑,頭部受猛烈撞擊導致腦震盪(下中圖),創傷後遺更令她雙肩至頸椎、盆骨等全部歪晒,身體會不受控地搖晃並行不到直線,但她沒有放棄,靠自己意志撐住拍劇唸對白,好堅!

前年她被發現到醫院腦科求診。

撰文、攝影、攝錄:娛樂組


鍾意就快D Share啦!