游到成條飛魚咁，好生猛！
娛樂偵訊
周子揚上海開工作室發圍
前度何傲兒被拍得與台男同遊海洋公園，甩拖周子揚自動失蹤一段時間後，最近再度出沒。記者發現他一個人在淺水灣做掌上壓舉啞鈴，更由岸邊操到落埋水！
據了解，同無綫已經滿約的周子揚，早前在上海成立個人工作室，準備大展拳腳，所以開行 turbo狂操。
騎呢沙灘操
上週四（五月十九日）下午兩點幾，周子揚一支公出現淺水灣海灘，冇女同行亦冇伴，只見他做完掌上壓又舉啞鈴，好騎呢！
冇見一排，將頭髮染金的周子揚曬黑了不少。郁完一輪，已經流晒汗的他先灌水，之後在袋中摷了個蘋果出來，食完就落水。
閒日沙灘冇乜人，周子揚飛魚上身，撲水成個鐘，才上岸抹身走人！
唔再死守香港
同前度甩拖後，自動消失的周子揚同大台亦約滿，據知，他在上海成立了個人工作室，這幾個月冇影，原來是返了北京拍戲。
「其實 Hinson（周子揚）老豆想個仔幫手打理屋企啲生意，不過， Hinson對娛樂圈仲係好有興趣，同無綫滿約後，佢都做咗好多登台同司儀 job；又識咗唔少內地製作人，佢話喺北京拍咗部戲之後，發覺內地市場好大，需求量好多，就算唔係一線阿哥阿姐，都有好多機會。 Hinson覺得再死守香港冇用，所以佢喺上海搞咗個工作室，會同內地啲影視娛樂公司合作，嚟緊佢會拍一部內地電視劇，除咗管理自己，如果撞到啱嘅人， Hinson都會簽。」知情者說。
曬黑 man啲
成立工作室外，周子揚仍會兼顧地產和金融工作。
「 Hinson認為金融投資同娛樂事業絕對可以掛鈎，內地大部分藝人都會投資做其他生意，唔會只做一瓣。所以呢排佢真係好忙，就算有時間返香港見吓屋企人， Hinson都唔敢偷懶，日日走去沙灘操，因為佢想換過個 look，話曬黑啲望落可以 man啲喎！」知情者說。
百足咁多爪
32歲的周子揚， 09年做歌手入行，兩年後轉型拍劇， 11年加入無綫簽下五年經理人合約，不過，拍劇只係副業，周子揚百足咁多爪，父親周業德是擅長炒賣物業的「西貢地王」，周子揚自己亦與父親開設「星匯物業有限公司」，擔任執行董事，及投資開設「貝格隆證券有限公司」；近日，他在上海成立「周子揚工作室」，搞埋娛樂製作。
撰文、攝影、攝錄：娛樂組
|
鍾意就快D Share啦！
|
|
|
