藝人黃嘉樂於無綫熱播劇《心理追兇Mind Hunter》飾演王君馨的醫生老公方家朗，今次他於劇中可謂艷福不淺，只因他除了與太太君馨出演床戲之外，更被「小三」陳芷尤勾引而上演「車震」戲份！
劇情講到飾演網台DJ的海澄（王君馨飾）因為阿文（何遠東飾）尋母一事後事業起飛，惟老公方家朗向她表示想生小朋友的意願，雖然海澄擔心影響事業，但依然就範，但家朗卻臨時被召回醫院工作。其後家朗發現海澄偷服避孕藥，於是嬲爆賣醉，更於酒吧遇到護士同事子蔚（陳芷尤飾）埋身勾引，於是家朗最終抵受不了誘惑。
拍床戲零尷尬
黃嘉樂事後接受東網訪問，自爆與「準人妻」王君馨拍攝床戲時自己主動加咀戲！他說：「我同君馨曾經合作過，拍攝時佢仲未話結婚。（尷尬？）冇，我拍過唔少呢類型戲份。其實今次我要求再親熱多少少，因為鏡頭hold好耐，兩夫妻淨係錫頸會好奇怪，所以我問清楚君馨如果錫到咀有冇問題，佢了解後覺得劇情合理，我再同導演講。（你主動加咀戲？）因為老公冇理由淨係錫頸咁怪，劇本上寫有少少摸嘅動作，但電視尺度唔去得太多。（摸邊度？）大髀，我問清楚去到邊個位置，係男演員該做嘅。」
唔怕被封賤男
講到他與準人妻君馨上演床戲後，又與身材逼爆的芷尤拍車震戲，嘉樂笑言車廂好窄，雙手一直規矩行事：「架車好熱、好迫，我好佩服現實中愛刺激嘅人士。（驚唔驚車廂太窄而誤觸對手芷尤？）我兩隻手好規矩，男演員要避忌！」問他會否擔心劇集播出後，自己被觀眾封為賤男？嘉樂就大賣關子：「唔太驚，因為稍後劇情會交代，覺得我係賤男都冇計，最緊要睇晒全部劇情，我分分鐘係最值得同情嗰個！」
至於王君馨於稍後劇情更因走紅而惹來狂迷的滋擾，例如收到恐怖包裹及被威脅性命，一直以「受害者」形象示人的她更會因而漸漸被揭出鮮為人知的另一面。隨住劇情進入白熱化階段，觀眾定必坐定定收睇劇集，齊齊追兇！
|
鍾意就快D Share啦！
|
|
|