探熱針
李彩華請唔郁林峯做嘉賓
入行十七年的李彩華（ Rain），上週五（ 27日）於旺角麥花臣場館舉行處女騷，男友何遠恒唔只陪女友空肚彩排，還一人分飾多角全天候侍奉，做 Rain背後的男人。雖然個唱入座率得七成，但 Rain冇留力，套套透視裝上陣，又唱多首懷舊金曲帶動全場氣氛，講到唔請前度林峯做嘉賓， Rain直言：「邊度請得郁呀？」
後台直擊
男友一打七侍奉
陪女友空肚彩排
「十月的雨演唱會」開騷當日， Rain於中午到達場館踩台，平日食量驚人的她，當日竟然空肚彩排，難得男友何遠恒陪她封肚，他說：「十二點開始彩排，一直都冇食過嘢，佢做嘢時唔會食嘢，全情投入，佢慣咗。」 Rain忙彩排，又跳又唱，何遠恒獨坐台下足足六粒鐘，除間中去吓洗手間及傾過幾個電話，視線幾乎無離開過女友，他說：「今日好開心呀，精神上及體力上都好支持佢。」
提前度林峯
Rain：下次紅館先請佢！
穿紅皮褸襯透視裙性感開騷的 Rain，一出場就唱郭富城的《雨中感嘆號》，之後再唱黎明的《相逢在雨中》及張學友的《分手總要在雨天》，透視裙內的黑色小三角泳褲，全晚九成唱別人的歌，似去唱 K！ Rain說：「我好鍾意舊歌，好有感覺，相信觀眾都會有共鳴！」問 Rain為何不請前度林峯做嘉賓，她說：「邊度請得郁呀？係咪先？下次紅館我請佢，哈哈。」
分飛、攝影乜都做
排到傍晚六時， Rain終於肯停一停，但距離開騷只得兩小時，梳妝未整，連戰衣都未揀好，她惟有急步走入後台，與形象指導及友人，為穿那幾件戰衣而作最後試身。 Rain忙住揀衫的時候，男友何遠恒已化身為分飛員，為她分門票給老友。分完飛，有朋友找 Rain影相留念，何遠恒又第一時間揸機拍照，然後全天候攝影師一樣，由台前影到台後。見到女友件件都係性感戰衣，何遠恒一啲都唔介意，「 OK喎，有本錢性感好過冇本錢性感嘛。」
俾女友起雙飛
擔心女友餓親，何遠恒早有準備，見拜完神燒臘檔師傅斬好燒味，他第一時間拎住個外賣盒，留起一隻鴨髀及雞髀，給女友起雙飛。可惜 Rain忙於試衫，無暇領情，何遠恒阿 Q精神出來。「佢忙緊，放埋一邊佢會食，平時消夜佢都食到三隻雞髀。」
知道冷落了男友，又知他全天候身邊侍奉， Rain即補飛笑住向男友說：「辛苦晒呀！」至於結婚計劃？ Rain大賣關子說：「到時候上天安排好，大家咪知囉。」
陳慧琳接班人
Rain入行得到金牌經理人黃栢高力捧，並指她是「陳慧琳接班人」，由 00至 09年先後推出過六張唱片，第一張唱片更花上過百萬宣傳造勢。不過， Rain在樂壇的成績一般，只得《你唔愛我啦》及《愛一個人原來不易》較被認識。
撰文：娛樂組
攝影：王志輝
|
鍾意就快D Share啦！
|
|
|