林鄭請年輕人加入改組後嘅中央政策組，月薪介乎三萬至九萬五千蚊，唔知會吸引幾多人應徵？
八卦陣
力撐林鄭前競選辦公關被窒
上星期政府登廣告，請年輕人加入改組後嘅中央政策組做政策研究，本土研究所成員陳劍青一早話明唔會應徵，仲喺 fb話好多青年想上位都會仆去報，尤其係「玩『策掂』之類嘅政治吸納組織」，然後話要將青年訴求帶入政府，其實係俾政府借青年人把口宣傳林鄭政策。
相信佢所指嘅，係舉辦過「策掂──傑出政策人大賽」政策倡議比賽嘅組織「為正策士」。呢個組織嘅召集人陸瀚民，做過林鄭競選辦公關。《壹》仔報導過，林鄭鼓勵青年參政嘅政綱，疑似係抄「策掂」比賽嘅作品。
陸瀚民似乎對號入座，喺陳劍青 fb留言話○三年嗰陣，青年人仍然被歸類為「政治冷感」，當時已經有前輩爭取將青年聲音帶入政府，又話十幾年後，政府請年輕人由非政務官系統進入政府做政策統籌，「未嘗唔係走出一小步」喎。之後佢不忘 sell吓自己組織，同邀請陳劍青傾吓偈。
陳劍青就反擊，話青年人一直都有表達意見，每任政府都話會聽佢哋意見，但政府聽唔聽、青年有冇得話事先係關鍵，以一句「交流冇問題，交完同冇交冇分別，咁交嚟做乜？」結束呢回合。
陳劍青心水清，事關陸瀚民之後冇再留言，交流完真係好似冇交過。到時加入新中策組嘅年輕人，會唔會都係咁？
羅冠聰保釋踢波被隊友感動
香港眾志羅冠聰同黃之鋒，因為三年前發起重奪公民廣場而入獄，最近獲准保釋等候上訴。佢哋重獲自由之後，除咗第二日上電台分享獄中點滴，仲各有各精彩。其中羅冠聰就同班波友去踢波，隊友仲送咗隻最新嘅遊戲《 FIFA18》賀一賀佢，令佢「好滾動」。
羅冠聰喺 fb分享話，保釋後唔想頻撲應酬，因為佢欠最多嘅係親友，所以呢段時間會以佢哋為先，仲話：「誰都不是鐵人，監獄外的生活都需要時間適應。」輕咗三公斤嘅佢仲同「黑浪明星足球隊」班波友去踢波，有波入之餘，仲有禮物收添，網友們都叫佢好好享受吓。
至於之鋒離開監獄第一晚，就同父母、女友食團圓飯，佢講明希望未來兩星期可以不斷「食食食」，仲即刻玩入獄前新買嘅 PS4。抗爭以外，男生們似乎都離不開打機同踢波。不過輕鬆完，佢兩個就要重新出發，面對之後嘅審訊。
葉劉遲到黑面田二少滿場飛
新民黨主席葉劉淑儀最近宣布，唔會參加山頂區議會補選，因為黨內領導層認為佢依家嘅立法會同行會工作繁重，唔夠時間準備選舉，所以唔適合參選。葉劉即使公務繁忙，但上星期四都抽空出席海關一個典禮，不過就似乎不愉快收場。
話說當晚大會請咗好多嘉賓，包括立法會前主席曾鈺成、立法會議員田北辰同葉劉等等，海關關長鄧以海（ Hermes）都有上台發言，嘉賓獲安排到台上排排坐，但葉劉一直未見影。當其他嘉賓就座晒之後，葉劉先至現身，最終被安排坐最側邊嘅位置。
葉劉於是問咗句：「吓，我要坐側邊呀？」但都冇計調唔到位，佢只好無奈咁坐低，之後全程臉帶不滿又嘴藐藐咁款。至於早過葉劉到場嘅田二少同曾鈺成，就獲安排坐較中間嘅位置。田二少喺台上活動完咗之後，仲滿場飛同人吹水飲嘢。
至於接替鄧忍光出任海關關長嘅 Hermes，係十八年來首位內部晉升嘅關長，扭轉以往由政務官空降做關長嘅做法。《壹》仔聽聞海關上下都好歡迎佢，覺得佢夠親民。有參加典禮人士仲話，上屆同一個典禮，身為關長嘅鄧忍光，都冇獲邀出席。
謠傳梁耀忠旺角掟磚
從政者遇上流言中傷都幾平常，不過有時啲流言真係奇怪到冇朋友。早前有街工幹事喺天水圍聽到流言，聲稱梁耀忠「佔中、掟磚、反政府」，其中「掟磚」相信係講緊參與旺角騷亂。
《壹》仔問過聽到呢個謠言嘅街工幹事何惠彬，佢話上星期三喺街工一個活動上，從街坊口中聽到有人話阿忠「佔中、掟磚、反政府」，唔好去搵街工咁話。佢反駁指阿忠性格穩陣沉着，冇可能走去掟磚，亦唔係完全同政府冇偈傾，又話自從街工喺天水圍開展地區工作後，開始聽到呢類流言。
其實阿忠同雨傘革命、旺角騷亂嘅關係的確唔深，同屬街工嘅區議員黃潤達都喺 fb話，阿忠有參與佔中，不過多數喺後方支援，亦冇掟磚。阿忠都曾經被影到喺佔旺清場期間，現身西洋菜街，被警員要求離開。
撰文:巫不言
|
鍾意就快D Share啦！
|
|
|