【爆相爆片】近年不少資深藝人轉行覓出路，現年51歲的李家聲入行30年演過無數角色，由強姦犯、智障人士及戇男都能演活，不過今年9月約滿無綫的他打算離巢，全因為演出機會買少見少，欠缺發揮機會冇位上，加上沒有經濟壓力無後顧之憂。萌生去意的李家聲日前就被本報讀者透過「爆相爆片」，影到他一臉𤷪𤺧和老婆現身中環。
李家聲參加87年第13期藝訓班入行，同學有鄭伊健和謝天華等，不過51歲的李家聲多年來演過無數劇集、電影，包括在電影《屯門色魔》及《仁心解碼II》中演變態色魔，而電視劇《封神榜》的雷震子、《阿旺新傳》的賓佬都演得入型入格，可惜他未能彈起上位做一線。
喜歡指點新人
李家聲一向喜歡指點新人，最經典要數04年拍《學警雄心》時被指經常寸爆薛凱琪（Fiona），拍煞科戲時見Fiona做訪問，他中途突闖入說：「做乜訪問呀？又講你啲歌唱事業呀？」令Fiona十分尷尬。不過近年李家聲有份參與的劇集買少見少，最近接演《金宵大廈》也只能演其中一個單元的小角色，故開聲教後輩的機會亦越來越少。他日前接受傳媒訪問時透露：「我9月約滿無綫，都考慮離開，我都半退休應該都唔制（唔續約）。」他又說：「我哋嘅存在係幫公司，但冇位畀你做都冇辦法，我覺得唔好玩，冇嘢發揮，咁都要諗吓其他。」
坦言樂見新人受教的李家聲又謂：「我教人都有樂趣，教多一個多一個，又帶唔到落棺材，但你唔擺我落去（劇集），我想講都冇得講，我都係想部劇出嚟好睇，唔想倒退咁核突。」
由於李家聲沒有子女和經濟壓力，所以自言已經半退休，惟他承認心裏對演戲仍然有團火，他表示：「我雖然就快52歲，但心境都係30幾歲，如果突然畀我做個一線位，我話一定得，因為仲有氣有力，但人講命運，唔一定靚仔就飛黃騰達，唔可以用咁嘅心態困住自己，總之我知自己係level5最top嗰個就OK。」
有過度活躍症
另外，本報讀者張先生日前透過「爆相爆片」分享他在中環一間電訊公司遇見李家聲的相片，張先生說：「見佢同個戴住口罩嘅女人一齊，好似佢老婆，李家聲同sales講嘢時個樣𤷪𤷪哋，喺間舖逗留咗近半小時，其間兩次走出店外煲煙，離開時突然停低半蹲彈番起身，個樣有啲𤷪𤺧，疑似喝住老婆『行呢邊』，之後兩人就一齊離開。」
採訪：嵐山
|
鍾意就快D Share啦！
|
|
|