51歲葛民輝有個青靚白淨嘅23歲兒子Jabez，之前喺英國讀大學嘅Jabez去年畢業返港，據知o依家喺一間投資公司任職，擔任Business Development Executive高位，年青有為。
日前阿葛一家三口到大坑開飯，生得高過老竇嘅Jabez，個樣就似媽咪，一雙憂鬱電眼殺死女，老婆同阿仔都着住
當日近中午12點，阿葛一家三口現身大坑醫肚，不過佢哋唔係光顧星級餐廳食貴嘢，而係幫襯區內最平民嘅茶餐廳，因為店裏面坐滿晒街坊爆棚，葛家三口唔介意坐喺門外嘅枱仔位。當日佢哋一家三口都着住阿葛旗下時裝品牌4A LIKE BLACK，果然一家人一條心。可能阿葛特登坐左邊面壁背住路人，中間係老婆，右邊有囝囝擋住，初時都冇乜人留意到佢，不過，阿葛個頭就好鬼搶眼，後面有九成頭髮剷青，刻意剷剩一個R字商標，潮過小鮮肉囝囝Jabez。
之後阿葛行出行入攞嘢又叫嘢食，其他食客終於發現佢：「咦，葛民輝喎！」阿葛都好淡定繼續開懷大嚼，跟手仲叫多碟豬扒加餸，三人食咗半粒鐘後離去，老婆同囝囝一馬當先走人，阿葛負責畀錢埋單，當佢行出門口時，被途人發現同佢打招呼，阿葛都有禮貌say hi。
佢哋行過兩條街攞車，阿葛同老婆喺前面平排行，Jabez就殿後唔做電燈膽，原來一家三口揸兩架車嚟開餐，Jabez揸嗰架係Benz，當阿仔行去開車門時，阿葛企喺後面壓住阿仔好似玩，將阿仔頂住喺司機位車門前面，唔知係咪叫阿仔小心揸車呢，只見Jabez同媽咪上咗Benz，阿葛就獨自揸七人車離去。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|