熱爆娛樂: 【要仔唔要狗？】被鬧「不知所謂」陳柏宇老婆嬲爆﹕唔通由佢哋打死 _

2018年4月22日星期日

【要仔唔要狗？】被鬧「不知所謂」陳柏宇老婆嬲爆﹕唔通由佢哋打死 __,陳柏宇,

陳柏宇（Jason）噚日出席活動時，透露屋企兩隻狗（老虎狗Bessie同鬆獅狗vv）呢排成日打交，由於Jason唔係成日喺屋企，得番剛懷孕3個月嘅老婆符曉薇（Leanne）同阿媽，擔心佢哋唔識處理，所以近排好心急搵狗隻訓練員，睇吓點樣幫佢哋。Jason又坦言曾經諗過最差情況係將其中一隻擺喺朋友屋企，咁樣佢可以日日去睇吓愛犬。（新聞連結： https://bit.ly/2JfHvT8 ）

雖然Jason話呢個決定係「唔希望行呢一步」，現階段都會搵狗隻訓練師睇吓可唔可以教番好隻狗，但Jason嘅言論一出，即刻惹來一班愛狗之人狂轟，鬧爆佢哋「不知所謂」、「擺明要仔唔要狗」等等。

Jason老婆Leanne今日就喺Instagram撰長文反擊，話睇到呢啲留言好嘔血，講明唔會棄養任何一隻動物，而交畀朋友暫養亦只係權宜之計，佢解釋﹕「我哋係諗BB啱啱出世時，先放去朋友度住，而個朋友係我哋以前同屋，Bessie第二個老竇，等幾個月BB安定咗就會攞佢返嚟。」

對於有網民留言話Jason夫婦教得唔好，Leanne就話搬咗新屋後先發生打鬥事件，但就從來冇心擔心狗仔會傷害BB，佢話﹕「一個喺地下，一個喺BB床，唔通佢識飛上嚟咬BB，我哋喺驚佢哋（兩隻狗）打傷，前幾日佢哋打(架)，到vv差啲咬中Bessie眼球，好彩咬到眉頭…唔通由佢哋打死？」Leanne話Jason最錫係Bessie，佢哋都唔明點解Bessie呢幾個月會性情大變，所以要搵專業人士幫忙。

其實睇番之前嘅ig，Jason同Leanne係好錫小動物，支持領養唔棄養，仲出錢出力參與拯救貓狗協會興建動物收容所。至於今次「棄養」風波，就要待時間證明一切。

精選娛聞，喺晒《娛果》

http://fb.com/appledailyent

Jason太太反擊，指Jason其實最錫Bessie。(ig圖片)	Jason噚日出席活動時話最壞打算，係放其中一隻狗仔去朋友屋企寄居。（資料圖片）	 Leanne喺ig反擊網民，指佢哋兩夫妻棄養「不知所謂」。(ig圖片)
 老虎狗Bessie同鬆獅狗vv原本好friend，但Jason最近搬新屋，Bessie同vv就成日打交。	 Jason月初宣布太太Leanne懷孕，唔少網民就質疑佢哋因為BB棄養狗狗。(ig圖片)	 其實Jason同Leanne好錫小動物，曾出錢出力幫貓狗重建家園。(ig圖片)