黃浩銘在社運界打滾十年，未見收成，先嚐牢獄之災。過去大半年，他先後因為「東北案」和「佔旺刑事藐示法庭案」兩度入冊。「東北案」正等待上訴，今年九月開庭：「到時可能又要入返去啦。」更大鑊的是，針對雨傘運動、他被控「公眾妨擾罪」，亦將於十一月開審，最高可判囚七年。前路灰黯，社運沉疴，他偏偏不可救藥的樂觀，「出來放個暑假都好，唔使咁辛苦。大佬，赤柱真係好熱，間房三十幾度。入去幾分鐘就成身濕晒。」
去年八月，十幾萬人上街聲援「13+3」政治犯。黃浩銘在囚也不愁寂寞，親友、市民的來鴻不能一一回覆。到今年一月，他再次入獄，筆友明顯減少，「人嘅熱情會遞減，好正常。我冇理由『再創高峰』，做單更大鑊、坐十年監，去爭取香港人嘅熱情。熱情係一下子，更重要係長期、理性嘅組織。」
群眾用了小林退熱貼。盟友又如何？黃浩銘上次出冊時曾經講過：「我哋呢班𡃁仔坐監，有無人跪低?有無人投降？我哋已經犧牲咗，你如何可以同林鄭飲茶？」拜托泛民友好要借政治犯來鼓動群眾，轉頭民主黨便與林鄭月娥把酒當歌，「老實講，係呢班人令我坐監、蒙受苦難。但即使民主黨同林鄭又食飯又盛，我都唔會話：攪錯呀！民主黨又賣香港。總之在大是大非，你唔好走咗去就得啦。」「我哋都有責任去監督、𥄫實佢哋。會唔會因為與林鄭關係好咗、就鬆章俾佢？」
來源 source: http://nextplus.nextmedia.com
|
鍾意就快D Share啦！
|
|
|
