26歲嘅游蕙禎，與梁頌恆遭法庭褫奪議席，去年8月被終審法院駁回上訴申請，立法會秘書處隨即去信向二人追討各約93萬元薪津。事件到依家，仍未解決。
未解決嘅，仲有官司。前年梁、游因為立法會主席梁君彥拒為之監誓，並轉往其他會議室開會，兩人聯同三名議員助理闖入會議室，被指衝擊保安防線，遭控參與非法集結。下月11日裁決。
被褫奪議席後，游蕙禎一度失業，更曾傳破產。早前3.11補選，梁、游又無端中箭，真係幾慘。
不過大家唔使太擔心，之前游蕙禎接受《蘋果》專訪時，曾透露謂已有穩定工作，仲叫大家唔使擔心佢。（文章連結： https://bit.ly/2EjkhZs ）感情生活呢？游蕙禎就承認：「呢幾年係有拍拖嘅，依家識嘅人的確係越嚟越局限於社運圈；以前嘅男朋友都唔係社運圈，都有啲都係會留意政治議題，但慢慢傾唔埋就byebye，我唔會好局限自己喺一段關係。」
噚日係兒童節，成年人都可以慶祝0架。下午三點半，著住紅色短褲仔嘅游蕙禎，身穿背心仔加背心外套，去大坑歎下午茶，同行仲有疑似男友喎！不過佢哋喺條街做嘅嘢就有啲兒童不宜——吸電子煙。個男仔一身黑，穿上少少窄身嘅長褲，睇得出線條有啲「緊張」，仲孭住一個黑色Tote bag。至於游蕙禎似乎有啲發咗福，面珠圓圓，但身形就冇點變。
兩人先去茶餐廳醫肚，對話都有啲「粗中帶幼」嘅字眼，相當率性。街坊似乎都唔察覺身邊嘅係游蕙禎，大家各不相干。
食完嘢，兩人漫步大坑道，物色場地——最後揀咗一條後巷嘅盡頭，傾密偈。男方仲拎咗支電子煙出嚟，增加氣氛。兩人沿路都係行到離行離列，保持空間感：身為公眾人物，游蕙禎亦相當警戒，四處打量有冇人影佢。惟直至吸煙呢個moment，兩人終於放下防線……
之前曾流出食煙相嘅游蕙禎，冇食煙，只係吸男伴嘅二手煙，仲挨埋男仔身邊，成個頭枕埋去對方膊頭，又俾佢睇自己部手機。
面對游蕙禎連串攻勢，呢位疑似男友終於失守，輕吻女方額頭，輕輕攬下腰咁。但呢個親熱少少嘅舉動，都只係維持到一支煙嘅時間，食完煙，佢哋又變番唔熟咁。之後兩人去到一間比較開揚嘅cafe，男方坐低唔夠一分鐘又食煙。兩人歎咗半個鐘，期間游蕙禎幫對方影下相咁。埋單之後兩人沿浣紗街行番出路口，要分手喇……男方明顯好唔捨得，攬住游蕙禎條腰，咬耳仔成分鐘，之後就向左走向右走喇。
事後游蕙禎回覆《蘋果》稱，私事不作回應，仲話希望大家監察多啲港珠澳大橋、高鐵甩轆同戴耀廷受批鬥嘅事件。
|
鍾意就快D Share啦！
|
|
|
