13年，陳靜（Dada）憑《低俗喜劇》奪金像獎「最佳女配角」，時至今日，她飾演的「爆炸糖」依然令人難忘。角色永遠青春，但時間不會為人停留，下月她便30有1了，難免被貼上中女標籤。
學懂「應付」抑鬱症，克服了耳水不平衡，電影長拍長有，這位新牌中女蠢蠢欲動籌謀自己的幸福。
「我就是想搵一個人去愛，狠狠地愛一場！」Dada說。
「其實都有想過，點會無吖！都會輕輕諗吓。如果生小朋友之後，應該係相夫教子嗰一類型，我諗我唔會再拍戲。另一方面我又覺得自己仲未準備好，因為想將最好嘅畀將來嘅小朋友, 我覺得物質上係容許嘅，但心靈上仲未得，我覺得要有時間陪佢，如果有小朋友之後就唔會再工作，我會將全部時間畀晒小朋友，或者係最重要嘅頭嗰六年。」 19年初，Dada因耳水不平衡足足停工一年養病。今年全面復工，除了上月的賀歲片，還有剛上畫的《Baby復仇記》。
戲中她與老公協議不生育，豈料意外懷孕，最後決定當媽媽。假若人生如戲，Dada又有沒有勇氣將新生命帶來這個世界呢？
「始終我太喜歡小朋友，覺得係一件寶物，同埋本身年紀都唔細，點解會唔要？一定會要，亦會以佢為先，如果佢嚟到嘅話，我就會行另一條路，即時隨機應變，人生仲有好多選擇。」
如果意外懷孕推前至13年，即奪得「最佳女配角」之後，Dada又會否為新生命放棄大好前途呢？
「呢個喺我人生中遇過最難嘅問題！如果有咗我一定會要！當年嘅我有信心自己喺事業、愛情、家庭都應付得到，思想上比較狂妄，但咁多年嘅社會大學經驗話畀我知，要做好一件事其實好困難，所以而家唔會再咁樣，懂得分輕重。」 Dada在新片中初嘗做孕婦的滋味，坦言這個角色某程度上跟自己很相似。
「我都係一個比較強同好勝嘅人，好多事情都想自己去處理，家庭上希望其他人會當我喺支撐者、支柱，唔希望示弱，本身性格有啲倔強，想保護其他人。而呢個角色亦一樣，會希望保護其他人，係一個比較好勝嘅角色，呢方面同現實生活中有啲相似，仲有一個相似之處，就係大家都係喺單親家庭成長，相比之下我自己缺乏一樣嘢嘅時候，反而會愈想要，我希望將來會有一個溫暖嘅家庭，小時候嘅經歷可能有少少遺憾，但我會體諒屋企人，反而會希望自己去創造，將來必定要有一個完整家庭。可能以往缺乏嘅，夢想將來最終都有個溫暖嘅家庭。」
----------------------------
【壹週刊 武漢肺炎專頁】
緊貼防疫資訊！口罩訂購情況、確診個案、病徵潛伏期、封關國家名單、保險點賠？
與你遠離瘟疫 睇清官謊！
立即睇
-----------------------------
【壹週刊直播平台 ChannelNEXT】
專家教你自保攻略｜口罩點揀｜防疫點做
立即睇
-----------------------------
疫情追蹤，最新消息，Follow 壹週刊Telegram：
點擊追蹤
來源 source: http://nextplus.nextmedia.com
|
鍾意就快D Share啦！
|
|
|
