香港已故粵劇名伶鄧永祥（祥哥）於97年離世，而他的妻子洪金梅（祥嫂）亦於去年7月離世，留下鄧兆尊、鄧翠玉（小艾）、鄧兆榮和鄧碧玉四子女相依為命。作為長子的兆尊，今後是否會以長兄當父，背起照顧弟妹的責任，而置身今時今日香港的亂世，鄧氏兄妹又該何去何從？日前《蘋果》登門兆尊府上專訪，開門的竟然是住在樓上的小艾，原來兆尊請她下來幫忙招呼。
自從03年把永祥大廈賣給東華三院後，兆尊四兄妹仍然沒搬走，繼續租住在這裏，每人有一個單位，兆榮因為有一家四口，以前祥哥住的頂層大單位，兆尊讓給了弟弟住，他自己跟女友大婆Carmen住在樓下約千呎單位，小艾就和兒子一起住，妹妹碧玉就一個人與26隻貓一起住。之前曾經有傳他們兄妹想把4萬多呎的西貢地皮重蓋豪宅，然後四個家庭一起搬入去住，不過兆尊否認說：「唔會呢度由出世住到而家係有情意結，對人、對事，同啲街坊都有感情，搬咗我肯定佢哋會唔慣，之前兆榮係提過吓想攞西貢塊地嚟起屋，但我同佢分析過，西貢唔啱佢住，蚊又多，大家又住慣市區，一落街食乜買乜都咁方便，搬去咁遠住，唔識揸車嘅，交通又唔方便，使乜住到咁奢侈，放盤賣咗佢好過。」
問兆尊還有興趣做幕前嗎？他說：「興趣係有嘅，但要明白，有時唔係話你想揀一樣嘢做就做到嘅，有得必有失。之前我有搞生意，投資過飲食，細佬就投資金融，不過而家大環境咁差，局勢又唔明朗，我哋都覺得要縮，暫時乜都唔好郁住，保留實力。」
他又指這個家依然交由小艾當家管財政：「阿媽元朗間大屋都交埋畀佢打理，佢得閒會返去元朗住，睇啲工人同狗，見佢都好開心，佢鍾意嘅話以後咪畀佢住囉！佢都啱住，嗰度夠大，佢又鍾意養狗，有咁大地方畀佢放狗啱晒。而阿媽骨灰又埋喺呢間屋花園，所以間屋唔會賣，將來小艾可能會同個仔搬返去住都唔定，因為東華好似想重建永祥大廈，到時我哋四個未必會住埋一齊，細佬想住跑馬地，不過我希望大家盡量住喺附近。聽說重建計劃都係一、兩年後嘅事，仲可以慢慢打算。」
提到最小的妹妹碧玉，兆尊都佩服一個人與20幾隻貓一齊住，一樣井井有條，一方面又在學習中醫和命相，碧玉有自己的世界，不太理會人家的事情，兆尊：「佢得閒會搵我哋做吓白老鼠，幫我哋睇吓命相、風水，有乜頭暈身㷫都會叫佢睇吓，佢都學得唔錯，遲啲應該可以去考埋個中醫牌返嚟。」
問到四兄妹感情如何？他說：「一如既往，都幾好嘅，互相窒吓，我唔會恃住自己係大哥就打壓佢哋，有時會俾佢打壓返轉頭，好似我細佬會話我哋都結晒婚，你係大哥，點解仲唔結婚呀！我話見你個樣幾乎想塞返個B入去咁滯，我點解仲要結婚，有個家庭唔難，但點樣去教育小朋友先難，呢方面我細佬係做得幾好，佢啲仔女都幾厲害。」
最近香港局勢亂，不少人都計劃移民，問兆尊有沒有此打算？他表示：「我自己就冇移民打算，喺政治立場我係冇色嘅，以前去過咁多地方，我都係覺得香港最啱自己生活，不過我啲細佬妹係有移民打算，個妹想去大馬住，我唔會阻止佢，但會提醒佢只係去過大馬一次睇過，嗰邊生活模式到底啱唔啱佢，我會分析畀佢聽。作為大佬，係會擔心細佬妹，因為喺我眼中，佢哋好似未入世嘅小孩子，但有時不斷勸佢哋係冇用嘅，就算同佢哋講玩滑板會跌嘅，佢哋係唔會信，直至真係跌到痛，佢哋先會聽。」
撰文：鍾國仁
攝影：沈健程
攝錄：林德雄、葉君海
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com
|
鍾意就快D Share啦！
|
|
|