上身無衫着 只著一條短褲
上身無衫着 只著一條短褲
電視劇《香港愛情故事》寫實貼地廻響大，其中白彪跟龔慈恩一對老夫老妻的愛情故事，由老牌公屋華富邨開始，二百多呎居住環境，一家人都要張就過生活。
現實生活，白彪的人生同樣由公屋開始。六十年代，大部份香港人生活貧困，白彪跟着父親由內地來港定居，一家人先住在老竇搭建「冬冷夏熱」的鐵皮屋，其後獲批搬入徏置區，雖有瓦遮頭，生活依然艱苦。
「阿媽當年生咗12個，我排第八，當時係天生天養，我記得有得著木屐已經好威，好似兩毫子做一對屐，行路時啪啪聲，著一條短褲，上身就無衫著，只係著一條短褲。夜晚瞓覺時，你返嚟又好，唔返嚟又好，因為當時屋企真係好慘，一家七口一張床，雖然張床都好大，但要瞓七個人。點樣瞓？唔好喇，我當時會去街邊啲貨車瞓覺。」白彪說當年跟幾個同齡朋友，用報紙墊木屐當枕頭，每晚走去停在屋邨附近的大貨車過夜，翌日早上回家。
「當時大約10歲左右，無讀書，當時根本無人理，又逃學，好多人讀書唔成，一齊玩嗰班人都經常逃學，去玩捉迷藏、射波子都好開心。爸爸媽媽都好放心，唔會好似而家咁樣，好緊張唔見咗個仔，當時只要知道你喺邊度，唔見咪唔見囉，因為最後始終都會返嚟。」他說。
中二開竅自覺好唔啱
中二開竅自覺好唔啱
成長環境複雜，白彪坦言慶幸未有學壞，他透露自己少不更事，更被人誘食白粉。「小時候唔係話大唔大膽，而係唔識諗，所以小時候跟住嗰班人，近朱者赤，近墨者黑。我哋當時讀緊中學，大約14、5歲，經常逃學，當時好興講球場上學，經常喺嗰度踢波，然後有啲年輕人會被踢入黑社會，如果唔肯跟就會出手打，或者會威迫利誘。當時仲有好多𡃁仔唔知死，吸死白粉，其實好多時都係被人導咗都唔知，佢哋會喺啲煙裡面加少少，然叫你吸一口。嗰啲食咗白粉兩三年，想導埋你，因為你啱啱開始食，仲有錢。」白彪說兒時經歷。
球場歲月，他又試過被誘「追龍」，是當時流行的另一種毒品，不過對白彪來說，毒品味道噁臭，他試過一口便棄掉：「我都有試過，但吸完之後，覺得呢啲咁嘅嘢點食得落，全部好似屎咁臭，食完又會作嘔，即刻隨手掉咗。」自認是頑童的他，又曾經貪玩偷橙偷蘋果，因自知跑得快，檔主根本跑不過他。
直至中二那年，白彪說突然開竅，有感自己「真係唔啱」，體會到沒有學識便不會有工作，於是開始努力讀書。
- 60年代，香港大部分巿民生活貧困，很多家庭都住在自己搭建的鐵皮屋 。
- 當年的徙置區，居住環境十分擠迫，一家多口住在百多呎居所，由於父母都要工作，小孩都愛留連球場，更成為不少罪惡溫床。
- 白彪小時住在牛頭角徏置區，除厠所公用外，頂層大都用作小學班房。
- 六十年代生活艱難，低下階層的小孩通常都沒有鞋穿，要赤腳走來走去。
賺錢拒做第一男主角
賺錢拒做第一男主角
於是，另一個故事開始。白彪開始習武，正式拜師學空手道、洪拳、蔡李佛、六合八法等，其後考入邵氏武術訓媡班，令他有機會進入電影圈，和洪金寶、成龍等當時一批仍未冒起的功夫明星，在韓國拍電影搵真銀。
自小貧窮，令白彪認搵錢生活最緊要，故此當機會來到時，他選擇賺錢而放棄第一次當男主角機會，他說：「主角唔想做，因為當時跟隨一位武術指導，我負責做副指。期間又做替身，又做武師，一日搵三份人工，人工好過男主角，7幾年時，每日搵超過一千蚊，已經好厲害，當年打一份工，月薪都係一千蚊左右。」雖然在擔任替身時，一場由三樓跌落地的武打戲，他不慎跌斷腳，被迫在韓國休息三個月。他本來以為敷幾劑跌打藥便沒事，幸而有懂韓語的朋友安排他到醫院接受治療，現在說起來，他仍然感激對方：「敷咗幾個星期，隻腳都仲係好腫。好彩朋友叫我去照吓，如果唔係以後行路會拐吓拐吓。」
回港後，他簽約當年新開的佳藝電視台拍古裝劇，飾演《射鵰英雄傳》的郭靖，他說：「當年劇集一出街，整個徏置區都聽到呢首主題曲，你諗吓幾受歡迎。」
未幾，佳視倒閉。到90年代，英雄片式微，事業走下坡，他更試過接近零工作量，有經濟能力的他決定移民加拿大，過去三十年，他間中會返港拍電視劇，在TVB三出三入，期間也演過《神鵰俠侶》裡的中年郭靖，時維1995年。輾轉到今日，連續有份演出的四部劇出街，更被網友稱為「白彪之夜」。
事業高低起伏，白彪倒看得很開：「有好多人會過唔到，會諗返當時幾威，忽然之間無聲無氣，人氣又跌番落去，嗰種心情好多人接受唔到。但坦白講，呢種感覺曾經擁有咪算囉，始終都會有低處。」
對於被指事業再創另一高峰，白彪沒想太多，更不脫舊式藝人的謙虛：「我唔夠膽咁樣講，希望各位觀眾多提點，畀我多啲意見，多多捧場。」
- 白彪年青時習武，在邵氏武術班跟林蛟學武。
- 70年代，白彪跟米雪在佳視開拍的電視劇《射鵰英雄傳》扮演郭靖和黃蓉，當年極受歡迎。
- 目隔四十多年，他和同期出道的羅樂林在《愛•回家之開心速遞》再扮大俠。
- 在《踩過界2》，他飾演潦倒老漢，晚上在連鎖快餐店過夜，他說開拍前做RESEARCH，希望演得神似。
- 在《使徒行者3》，他飾演江湖人物，也入型入格。
----------------------------
按此訂購「壹週刊 X 勁揪體 2021 和你壹起撐住香港」月曆
----------------------------
守住新聞自由 和你撐壹週刊計劃 每月港幣$300起
按此了解更多
-----------------------------
英國移民、升學、就業、買樓生活資訊！
立即加入「走佬去英國 － BNO 5+1 移民資訊研究所」
來源 source: http://nextplus.nextmedia.com
|
鍾意就快D Share啦！
|
|
|
