2015年5月1日 星期五

翁靜晶出手出樓打救吳綺莉 [忽然1周 - 1031] 翁靜晶,吳綺莉,MW,



28/4

做大律師嘅翁靜晶非常淡定,周二( 28日)陪完吳綺莉見校長之後,同傳媒講:「傾得好開心,今日好有成果,同學校達成好多共識,我諗我哋會好好。」在旁嘅吳綺莉明顯鬆一口氣!

媽咪姐

翁靜晶出手出樓打救吳綺莉

呢個幾月嚟,見到吳綺莉同阿女卓林嘅關係真係……一言難盡囉。三月初,吳綺莉涉虐兒,卓林由社署安排,暫住契媽嗰度。後尾兩母女和解,卓林搬返屋企。但上個星期三( 4月 22日)阿女又唔肯返屋企,就算吳綺莉親身去學校同校長交涉都冇用。








終於呢個星期二( 4月 28日)吳綺莉再次返學校「講數」,仲搵埋識咗廿幾年嘅朋友翁靜晶一齊去,佢哋同校方傾咗接近 1個鐘。走嘅時候,吳綺莉心情真係開心番好多!佢同媽咪姐講:「係我主動搵 Mary姐(指翁靜晶)幫手, Mary姐都係媽咪,好明白我感受。呢次同校方傾完,校方嚟緊終於肯配合我,咁樣對個女會好啲囉!」

其實之前吳綺莉都試過單拖返學校「講數」,最終不歡而散,呢次翁靜晶一出山就搞掂,睇嚟呢個律師真係「有料到」喎。

卓林翌日去南丫島玩玻璃製作,好 happy。只係佢同吳綺莉之間,需要空間同時間去互相再了解啫。

8/4

4月初,卓林原本已經由契媽屋企搬返去同阿媽吳綺莉一齊住,點知兩個禮拜後,母女爭執,卓林又離家出走。

依家翁靜晶建議俾卓林去佢康樂園嘅屋企暫住,等兩母女可以冷靜吓。翁靜晶屋企有私家花園同泳池,的確有好多空間俾卓林思考。圖片

吳綺莉同翁靜晶係識於微時嘅好朋友,大家都性格爽直,非常啱傾。周三( 4月 29日)佢哋分別出席活動,翁靜晶繼續維護好友,話吳綺莉係唔識解釋嘅人,叫大家唔好俾壓力佢。而吳綺莉就話:「我覺得學校同家長聯繫好緊要,其實呢年幾冇同學校接觸過,呢個係兩邊都有問題。」

吳綺莉話除咗翁靜晶,佢仲搵咗好朋友謝偉俊幫忙,提供意見。有大律師加立法會議員幫手,一定搞得掂嘅。

翁靜晶呢個老友除咗「出手」搞掂學校外,仲話卓林可以搬去佢康樂園屋企住,「 Mary姐話佢有司機,每朝可以送阿女返學,佢同我又係住大埔,我去探阿女都方便,住 Mary姐屋企我又放心。」不過,都要等社工同卓林講咗先,因為卓林唔係咁熟翁靜晶。吳綺莉又話:「卓林依家住喺我另一個朋友屋企,唔住契媽度(跑馬地),因為返學太遠嘞。」

唉,呢個阿媽驚死阿女住得遠,會瞓少咗!你話點可能唔關心個女吖?其實母女情深,一人讓一步,有商有量,冇嘢係解決唔到嘅。

單親媽媽唔易做

香港地,生活艱難!如果係單親媽媽就更加辛苦,搵食之餘,又要照顧仔女,三頭六臂都未必搞得掂。除咗吳綺莉,圈中唔少單親媽媽都遇過阿女反叛期,真係勞心勞力㗎!

王菲 竇靖童 唔 like繼父勁反叛

王菲同前夫竇唯生咗囡囡靖童冇耐就離婚,自細習慣冇老竇喺身邊嘅童童非常獨立。踏入青春期,佢就剪短頭髮,打扮中性,據聞王菲用咗好多心機,先令阿女「變番」女仔!不過,童童成日頂撞繼父李亞鵬,所以有段時間俾王菲送去上海寄宿。點知又爆出童童孖男同學去夜蒲,嚇到王菲又召佢返北京。最終靖童被送到美國讀書,生活簡單咗,得閒作下歌放上網。王菲安樂晒。

李司棋 葉子青 無聯絡 7年

司棋姐喺 80年代移民加拿大,因為要坐移民監,同老公分隔兩地。最終入咗籍,但老公移情別戀,獨生女葉子青亦嬲咗司棋姐,誤會佢唔要自己。結果母女有 7年無聯絡,傷透司棋姐個心,直至子青大學畢業,終於諗通,再搵番阿媽。後來兩母女仲試過一齊演舞台劇,依家子青長居多倫多做電台,兩母女日日電話溝通,都好 warm㗎。

肥姐 鄭欣宜 分隔兩地難照顧

肥姐同秋官喺囡囡鄭欣宜仲係 BB嘅時候,已經離婚。欣宜自細由長居加拿大嘅婆婆照顧,肥姐就獨力留港賺錢,有時間先可以飛番加拿大探女。所以欣宜十幾歲嗰時都幾反叛,試過特登唔聽肥姐電話,匿埋食煙,最初拍拖都冇同肥姐講,激到肥姐死死吓。不過欣宜性格其實好孝順,仲愈大愈懂事,喺肥姐患癌期間,照顧周到。依家欣宜仲咁積極練舞 plug歌,相信肥姐泉下有知都好安慰。

鍾意就快D Share啦!
Related Posts Plugin for WordPress, Blogger...