2015年5月1日 星期五

廚男節目添食 霆鋒搵青雲打頭陣 [忽然1周 - 1031] 霆鋒,劉青雲,青雲,謝霆鋒,MW,



娛樂喧

廚男節目添食 霆鋒搵青雲打頭陣

近年謝霆鋒的廚男形象深入民心,去年他為浙江衞視製作的處男飲食節目《十二道鋒味》,在內地首播時獲一致好評。今年他食住個勢,添食拍第二輯。據知上輯嘉賓以偶像藝人作招徠,今輯嘉賓更勁,頭炮有新鮮出爐影帝劉青雲,再搭「宇宙最強」甄子丹,走遍大江南北掘長白山人蔘。

霆鋒五月更會在中環開自家製曲奇旗艦店,以甜酸苦辣味道作賣點,誓要拓展飲食版圖。

霆鋒離婚後忽然愛上入廚,他身邊幾乎所有友好都試過其廚藝。霆鋒也曾言因此拉近與家人的距離:「我以前唔太講嘢,因為美食先同媽咪傾偈,又會叫爸爸食飯,仲同朋友分享。」

電影拍檔

青雲與霆鋒 2012年拍《消失的子彈》結緣,近日再合作郭子健執導的《驚天破》,在公在私默契十足。

巴黎冧武則天

上輯其中一集,霆鋒與范冰冰在巴黎街頭鼻貼鼻打情罵俏,冧暈這個「武則天」。

影帝收車馬費

去年,霆鋒收取 3,000萬天價人仔拍《十》,至於今輯,有傳他只略略加價至 3,300萬接拍。在第一輯中,霆鋒環遊了 12個國家上山下海搵食材,亦展現了大廚功架。據知在新一輯,他反而回歸內地,訪尋杭州、長白山、雲南、九寨溝等靚景尋回失去的味道。

至於形式上,今集將與上一輯略有不同。霆鋒會找四位好友,組成「鋒味家族」團隊,並在每集出現任霆鋒二廚,成員包括近期紅爆內地的陳偉霆及林峯等。另外再邀請有分量的藝人,任神秘嘉賓。

本刊收到消息,近日與霆鋒忙拍電影《驚天破》的出爐影帝劉青雲,已答允亮相做頭炮嘉賓,其餘嘉賓包括甄子丹、任達華和林憶蓮等。知情人透露:「霆鋒今次係第二次同青雲拍戲,本身 friend friend哋,平時青雲都好 family man,成日煮飯仔𠱁老婆㗎!佢仲搞笑話今次當去旅行又可以學吓嘢喎!而丹爺係楊老闆嘅朋友,就算幾忙都會答應。佢話自己喺美國大,平時煮開西餐,反而好少接觸中菜,都想研究吓!其實好多嘉賓好似青雲咁,都係一拍即合,冇傾酬勞,只象徵式收車馬費。」

宇宙鬥 chok

「宇宙最強」甄子丹與英皇合作無數,同老闆楊受成私交甚篤,拍心口幫手。不過他與霆鋒都出名 chok,如成事的話肯定鬥餐死。

任達華與霆鋒同屬英皇,霆鋒叫到當然冇托手踭。

憶蓮幫拖

據知因男友恭碩良關係,林憶蓮會客串一集任嘉賓,並會與霆鋒合唱主題曲。

炮製自家曲奇

Mani與霆鋒相交 16年,合作無間。上一輯《十二道鋒味》,二人在趙薇的法國酒莊煮大鑊飯, Mani也有一展廚藝。

忙到氣咳的霆鋒,近年做老闆做上癮。據知他在一月時,與已故全國政協副主席安子介外孫楊鼎立,合資成立了自家品牌「籤語餅」,並投資逾百萬,將於五月中在中環歌賦街、善慶街交界開舖賣曲奇。

知情人續說:「霆鋒其中一個嗜好係整餅。佢好鍾意自創奇怪口味嘅曲奇,佢覺得要食普通味道,市面上大把,要開舖就要創新,所以佢整嘅曲奇,甜酸苦辣都會有。佢仲已經將自己個『鋒』字申請咗專利,到時印喺曲奇上面。佢話遲啲仲會出埋廚刀同食譜㖭!」

至於霆鋒經理人 Mani,亦有份投資逾 10萬。她日前就霆鋒開舖一事回應說:「我哋唔會喺內地開店,曲奇喺香港製造,咁先可以嚴控品質。其實我哋主力做網購,目標係全亞洲嘅市場。」

中環開餅店

霆鋒位於中環九記牛腩附近的曲奇餅店正趕工裝修,記者發現新舖樓高兩層,地面應是做門市賣曲奇,而樓上閣樓則可放置一、兩張枱仔,預計可賣埋咖啡。而裝修師傅亦向記者透露可趕及 5月中開舖。

鍾意就快D Share啦!
Related Posts Plugin for WordPress, Blogger...