掃呢頁CODE去手機

2015年5月1日 星期五

大台癲劇翻叮 [忽然1周 - 1031] MW,



靚抽王

大台癲劇翻叮

冇人估到,一套 23年前開播, 18年前重播過嘅劇集,依家竟然會再次掀起熱潮。都唔知應該讚以前啲劇勁,定話依家啲劇屎,又唔知大台以後會唔會同亞視一樣剩番重播?點都好,觀眾對《大時代》呢啲第一集就掟人落街嘅癲劇確係情有獨鍾。

好!我哋就做吓好心,睇吓《大時代》播完仲有乜嘢陳年癲劇可以播啦?

《龍兄鼠弟》( 1993)

賣點:癲佬教你做人道理

淨睇卡士已經非常吸引,萬梓良加鄭則士兩大影帝,仲有鼠弟張衞健同當時青春可人嘅朱茵。套劇講萬子飾演一名極度偏執嘅醫生雷文鳳,為咗幫義弟張衞健翻案(其父被鄭則士所殺再灶底藏屍)而愈嚟愈癲,手段無所不用其極。同《大時代》相似嘅係,呢套嘢,第一集已經玩到好大,倒敍法講萬子入咗精神病院被研究,但啲醫生不單止唔能夠判定佢有無精神病,反而俾萬子分析佢哋邊個係精神分裂同性變態,癲得嚟甚具創意。

《第三類法庭》( 1994)

賣點:傻佬教你做人道理

淨係個劇名都知唔簡單,咩鬼嘢係第三類法庭?第一類係指法治上嘅法庭,第二類係傳媒所構成嘅輿論法庭,第三類法庭就係人嘅良心!此劇由邵美琪飾女記者,而值得一提係喺《義不容情》奸到殺老母嘅溫兆倫竟然飾演梗直青年,最尾為咗令走入歪路嘅邵美琪醒悟,仲由梗直順利變成痴呆,煽情得嚟又睇到人幾欷歔。不過溫兆倫做好人始終有欠說服力,硬是覺得佢係有陰謀,點知佢變咗傻豬豬都未進行絕地大反擊囉。

入面成日提住「青蛙與蠍子」呢個故事,提醒大家做人唔好俾蠍子搵笨呀。

《誓不低頭》( 1988)

賣點:殺人王曾江殺得性起

由韋家輝做編審,劇情灰到發噩夢。鄭少秋飾演大好人謝文武,老婆走佬仲被屈殺人,坐十幾年監,出到嚟想翻案,老友被燒死,個仔俾人拉,女友被輪姦……夠喇!黐線嘅咩!另一個大賣點,係出爐金像獎男配角曾江飾演大奸角陸國榮,殺人全家嗰一幕,細路仔都唔放過,仲恐怖過《人肉叉燒包》,完全唔明當年點解可以喺電視度播。

結論:提議大台將重播劇放喺黃金時間度播,新拍嗰啲就留番半夜,唔好搞到觀眾要捱更抵夜嘛!

娛樂微波爐

本欄目旨在翻叮一啲已經熟鬼晒嘅嘢。

鍾意就快D Share啦!