黃浩然拎住性感紅色內衣褲當街調戲煒哥。
探熱針
俾黃浩然扯胸圍底褲 失婚陳煒被調戲
自從煒哥承認同老公顏志行原來已經離婚五年，回復單身的煒哥專心寄情工作，日前她現身油麻地龍蛇混雜地方，雖然 43歲但有樣又有身材，難怪佢俾成班麻甩佬圍住來調戲，仲要俾人拎住啲胸圍底褲來「索」，搞到煒哥當街求救。
俾仔圍
之前要人前扮幸福「人妻」，上年拍飲食節目仲要飛去搵前夫顏志行做「大龍鳳」扮恩愛，陳煒有苦自己知，今年前夫拖嫩口台灣歌手鄭雙雙，搞出偷食疑雲，陳煒終於澄清同前夫已經離婚五年！
失婚已經夠慘，事後仲要被圍插指她有心「瞞分訊」，好彩煒哥夠硬正，在新劇《果欄中的江湖大嫂》擔正做女一嘅煒哥繼續搏殺工作，早前穿上白色短裙的她現身油麻地為新劇開工，劇情講到黃光亮幫手推行李喼時，一個唔小心個喼爆開，散到一地性感喱士胸圍底褲，煒哥隨即俾成班麻甩佬圍住來調戲，仲要喺佢面前拎住性感內衣褲不停又扯又「索」，煒哥即時發癲大嗌，之後黃浩然同拍檔仲要拎起成 set內衣幫煒哥度身，搞到煒哥好尷尬！
有人追
同前夫顏志行再見亦是朋友，早前仲科水俾煒哥買豪宅，大把 cash喺手的陳煒生活無憂，加上個樣 keep得好，煒哥大把 market，據知宣布回復單身後，已經吸引到人追求！
「我哋身邊班朋友個個都鼓勵佢識多啲人㗎，佢都冇話收埋自己，仲好踴躍出席朋友聚會，佢都有人追㗎，不過佢話難得而家工作咁順利，想放多啲時間喺工作上面，拍拖嘅嘢隨緣！」陳煒身邊人透露。
撰文：娛樂組
攝影、攝錄：余一樂
來源 source: http://hk.next.nextmedia.com
|
鍾意就快D Share啦！
|
|
|