雖然包到冚，但都學巫啟賢話齋，「這個人很有何傲兒的味道。」她手持住一粒水晶，另一隻手不停在上面打圈，感應水晶磁場。
探熱針
洗黑氣：鬼祟催運斷正 何傲兒驚青逃走
何傲兒呢排都算運滯！同掟煲唔掟蓋的周子揚車廂野戰，都撞正警察照田雞，仲要被《壹》仔全場直擊，激嬲「爺爺」老細林建名，搞到要同「爺爺」黐實睇演唱會，做賠罪人肉騷。
頭頭碰着黑，係時候擺個陣催運！日前，記者發現何傲兒鬼鬼祟祟化身「蒙面姐仔」又口罩又帽，包冚到深水埗劏鋪商場一間專買風水擺設同水晶的鋪頭，搵「專業人士」，助她轉運。
蒙面行深水埗
在深水埗西九龍中心，專營蚊型劏鋪的蘋果商場內，記者發現一名短裙襯白色乾濕褸，孭住粉紅色 Prada Classic Saffiano tote bag的女子，身影望落極似何傲兒；加上她刻意將帽拉到極低，再用口罩包住塊面，連對眼都幾乎睇唔到，蒙面程度，重手過李克勤、梁詠琪上大陸節目《蒙面歌王》，相信巫老師巫啟賢都真係唔會認得出！
咁鬼祟，原來真係何傲兒。話晒都係過氣港姐同電視台姐仔，竟然唔係中環行名店，選擇到龍蛇混雜的深水埗區，行專賣淘寶貨，劏鋪主打的蘋果商場，仲要明顯熟晒架步；去到其中一間賣風水用品及水晶的鋪頭仔，應該是熟客的她不斷問老闆娘有關水晶問題和功效，其間更攞起一嚿水晶，放在左手掌心，然後右手不停在上面打圈，嘗試感受水晶的能量。在店內逗留了大約十分鐘，之後因發現有記者在場，立即極速離開。
慌失失扮傾電話
記者跟上前問何傲兒為何出現？是否想擺陣催旺事業姻緣，平時面對傳媒有問必答的她一反常態，愈問愈走，在商場內的窄巷左穿右插，慌失失！又攞起手提電話扮傾偈，迴避記者提問，直到被問有否養鬼仔（古曼童），她才緊張耍晒手俾反應。
之後因為等電梯，何傲兒終於企定定，但記者一開聲，她又即刻慌忙攞起電話繼續扮傾偈，見記者窮追不捨，何傲兒終於妥協。
「我第一次嚟咋！頭先同爸爸一齊行街，你影唔影到我爸爸呀？（唔見喎！）吓……佢啱啱走咗十五分鐘咋喎，（以前幫襯開（水晶店），見到你攞上手試）唔……我都係嚟行街啫！」何傲兒不耐煩地用手遮擋鏡頭，之後就搭電梯離開。
事後到水晶店問老闆娘，對方表示唔認得何傲兒是藝人，但她自稱對水晶很有興趣，睇了很多不同種類的水晶，至於何傲兒是否特別想求姻緣或事業，老闆娘聲稱她攞到手上的 Super Seven（超級七輪水晶），求乜有乜，對姻緣、事業、健康、財富都有幫助。
頭頭碰着黑
事實上，何傲兒近期運氣的確麻麻，同男友周子揚拖拖拉拉，分手又復合，車廂幽會又遇到警察照田雞，斷正！搞到要諗計氹番「爺爺」老細林建名。
感情上要花心機左右逢源，事業方面亦停滯不前；原本諗住離開無綫投靠林建名，會獲「爺爺」力捧，點知工作量比之前更少，曝光率亦大幅度下滑，真係要擺陣，轉吓運！
神奇水晶
何傲兒想買的超級七輪水晶（又稱三輪骨輪水晶「 Super Seven」），極為罕有，是一種能量強大的晶石，此石特別之處在於包含七種共生礦物，包括紫晶、透明水晶、茶晶、黃磷鐵礦、針鐵礦、纖鐵礦及金紅石；不需要淨化和啟動晶石，本身充滿能量，基本上「 Super Seven」功效廣，旺財富、催桃花、人緣及有治療作用，能淨化負面情緒，提升正能量，價錢由幾百至幾千不等，大受水晶迷歡迎。
擺陣催運
娛樂圈不少人都會信邪！喜以各種陣法求好運，總之可以催旺桃花事業，加強運氣的話，幾多錢都肯使！
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|