陳葒幻想有朝一日可在小島開辦學校，他早前辦體驗營，六十名學生有來自中產及基層，中產要繳交四千二百元費用，基層則可獲豁免。
壹週人物
小島夢
正當全城討論十優狀元與名校之際，有人企出來話：喺荒島上堂，先至係真教育。
為基層兒童創立「陳校長免費補習天地」的前匯知中學校長陳葒，正爭取政府免費批出大嶼山一塊荒島地，計劃二○二○年開辦「小島學園」寄宿學校。
早前陳校長組織六十名小學生大汗疊細汗，孭起大背包，跑到人跡罕至又無冷氣的芝麻灣半島南面大浪村，參加「小島學園」的體驗營，和他一同追夢。
點解有冷氣課室唔要，卻山長水遠到小島上堂？看看陳葒編排的時間表就明白──除了一般的中、英、數、通識課之外，還有非洲鼓、農耕、茶道、紮木筏，這些「課外活動」在小島學園通通變晒正規課程，「基本應試科目我哋會教，德育、才藝、創意都會掂，我哋着重全人教育，讓兒童學識工作及生活技能。」陳葒本想教學生寫 programme，但要待校舍落成才有器材。
在小島學園，中、英、數課堂都變得不平凡。義工預先整好帳篷，擋着熾熱陽光，學生踏着草地，在無牆課室上中文堂，老師給每人派一幅圖，有馬騮、長頸鹿、蒲公英，「今日教寫新詩，大家望吓自己拎住嗰幅圖，聯想到乜嘢？」再讓學生在紙上畫「腦圖」，將聯想到的都表達出來，手持蒲公英圖片的學生話：「好似一個個傘兵。」原來，在無牆課室上堂，思考也無框框，想像可以無限擴大。
小島學園的老師，也着重學生秩序和修養。有鬼靈精上英文課時搗蛋，老師請他到門外冷靜，他站在門前，卻專注望着牆上的螞蟻爬來爬去，陳校長見狀，即上前跟男孩一起觀察螞蟻動靜，「考試下嘅教育一定會忽略呢班學生，我哋主張有教無類，仔細發掘學生興趣，再慢慢引導佢去學去諗，俾佢一個奮鬥目標和方向，話唔定佢大個之後做生物學家。」
不做港孩
日照在頭頂，學生擔着小櫈，然後三至四人圍坐靜心上茶道課。茶藝師先示範，他們再用滾燙熱水澆茶壺、沖茶，「請品嘗！」陳校長說，他特地請來專業的茶藝師教導，「我哋教學生茶道，想培養佢哋心思細密、有耐性，學嘢能夠專注。」
小島上課除了學做文青，也要體力勞動。學生來到沙灘，齊心打結紮木筏，你拉一邊我扯另一端，學懂分工合作，之後一同將木筏推出海，再坐在其上，明白合作可以讓人划得更遠。
陳校長選擇在大嶼山大浪村辦學，這兒只有十多個村民、水電供應有限、無街市超市，在長洲要搭乘二十分鐘街渡，或在大嶼山徒步走兩小時才到達，與近年富貴學校爭在豪宅地段建美輪美奐校舍，明顯是兩回事。
陳校長說，小島學園將是一間寄宿學校，讓學生有機會與其他人一起生活、學習自理，煮飯、洗衫等全部要親力親為，他教出來的學生，不會有一個是衣來伸手，飯來張口的港孩。
做自己
陳校長陳葒，本是直資學校將軍澳匯知中學校長，○九年放棄百萬年薪，創立「陳校長免費補習天地」，為基層學童免費補習。近年他有感補習治標不治本，教育核心始終要靠正規學校，但他卻不滿填鴨式教育，「已經運作咗幾十年，如今成個社會都唔同晒，仲培育緊一班只係識考試嘅人出嚟，同社會脫晒節，根本係浪費人十二年時間。要改革就由下而上，從民間做起，改變基礎教育。」在他眼中，十優又 so what。人生，是學做人。
陳葒希望在小島辦學，讓學生不再做考試機器，做番自己，到畢業時周身刀張張利，能自信走進社會。他已開過幾次簡介會講小島理念，聽眾來自五湖四海，有家長、老師、建築師、金融界人士等，短短數月招募過百名義工，日後將再辦體驗營。
陳葒強調，小島學園不會是一所扶貧學校，不論是貧或富都有機會入讀，「將來招生，若然我哋得一百個位，有二百人嚟爭就會用抽籤嚟派位，你老豆係邊個、豎琴幾多級、以往成績有幾好都唔會考慮，收生之後先同學生面試，睇吓學生性格、程度，我哋再制定一套適合佢嘅教學模式。」他指學費未定，日後會資助貧窮學生。
小島學園計劃二○二○年開辦，陳葒稱，會吸收體驗營的經驗及成效，兩年內寫好報告書交予政府批核，「想小島學園係優質獨立私校，由政府批地俾我們，每年象徵式收取一蚊或十蚊，之後建校、辦學、營運都係由我哋決定，校本自由度會大啲。」四十七歲的陳葒說，一旦小島學園開辦成功，他會擔任學校顧問而不是校長，「校長，就留給後生一輩吧！」
撰文：陳雅欣
攝影：胡智堅
攝錄：廖健昌
news@nextmedia.com
|
鍾意就快D Share啦！
|
|
|