探熱針
重新上市：十年婚姻見紅 寫真復出 林雅詩：唔可以靠男人！
九十年代三級片女星林雅詩，同葉玉卿、葉子楣一樣，終極嫁人收山。結婚十年，三十七歲的林雅詩忽然再起，下月出人妻寫真。
復出背後有苦衷！有指林雅詩婚姻見紅，迫不得已再行性感搵食，她更坦言：唔可以再靠男人！
先斬後奏
有半百失婚羅霖打頭陣，媽咪級的林雅詩鼓起勇氣，拋開中年包袱出性感寫真。息影從良十二年，忽然在三十七歲復出出寫真，搏殺舉動，反映家住西貢千萬豪宅，過着少奶奶生活的林雅詩，同做生意的丈夫有危機。
原來今次出人妻寫真，也是瞞住另一半！
「其實佢唔知，問佢的話會過唔到關，依家咪當俾個 surprise。反應一係冇，一係就好嬲。」林雅詩說。
先斬後奏，林雅詩不在乎影響夫妻感情。
「豁咗出去！唔知會唔會有影響，順其自然。鍾意我就應該明白我，唔明都冇嘢好講。女人要獨立啲，唔可以靠男人，始終有咗小朋友，有自己事業安全感會好啲！」
已除低婚戒
訪問期間，記者發現林雅詩已除低手上婚戒。
「婚姻嘅嘢好難講，將來唔知發生咩事，你有你哋睇我嘅好，但始終女人要有自己事業，總之好多嘢唔好睇表面。」林雅詩言詞隱晦，但似乎對婚姻已失去信心，需要鋪定後路。
靠羅霖鼓勵
○五年，林雅詩下嫁經營鋼鐵生意的商人溫文英，翌年誕下兒子。婚後專心做家庭主婦，但息影十二年，仍保持一副戰鬥格。
其實早在數年前，已有出版商打林雅詩主意，不過真正打動她的，是失婚羅霖。
「佢（羅霖）喺咁嘅狀況下都做得咁好，激發我要向佢學習，係佢帶動我作出呢個嘗試。性感條路放低咁多年，出番嚟其實都有啲驚，但好多朋友鼓勵我，我亦想趁今次出寫真，睇吓自己能力去到邊。不過就算性感，都只係健康嘅。」
林雅詩唔擔心辣㷫老公，但堅持要顧及兒子感受，性感，唔再去到盡。
古仔緋聞女友
97年選港姐入行的林雅詩，有身材又肯露，當年得王晶賞識，三年拍了十二部三級片，包括《獸性新人類 2》、《魔鬼屠夫》、《九龍天空之魔鬼屠夫》，當中以 98年跟古天樂合作的《邪教檔案之末日風暴》最為人識，由於二人在戲中有大膽肉搏戰而傳出緋聞。
同期脫星
影圈脫星，大部分都已經上晒岸，嫁得好除了葉玉卿和葉子楣，同林雅詩同期的顏仟汶和陳昭昭，亦生活無憂，行性感，也有好下場。
陳昭昭
現年 40歲的陳昭昭，無綫藝訓班出身，二千年接拍三級片《人肉豆腐湯》及主持成人節目《性在任你 Call》。 04年陳昭昭開始轉型，積極參與慈善活動， 09年被委任柬埔寨王國家庭農業發展協會副會長，並獲發勳章。突然有米的她，近年做老闆開電影。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|