探熱針
親自落場： 20歲陳薔天入行 老豆江華做形象
消失幕前近十年的江華（原名陳木華），近幾個月頻頻見報，復出有跡可尋。不過， 20歲囡囡陳薔天（天天）快老豆一步，準備搶閘闖樂壇，有唱得媽咪麥潔文指點唱功外，打扮風格化的老豆江華負責做形象，又親自帶埋囡囡見唱片監製試音，等住做星爸！
自己未諗掂
數月來，江華由被影到在保險公司上堂，頻頻接受傳媒訪問，早前更將「巴打」劉華合照放上網，人氣盛，復出幕前，指日可待。
「有唔少內地公司見江華 keep到咁 fit，都想搵佢拍劇，不過佢自己搞緊電影嘅嘢，所以仲考慮緊；加上佢而家係諗個女先，因為天天想入行做歌手。」知情者說。
聲似莫文蔚
日前，記者在又一城見到江華兩公婆與囡囡陳薔天食 lunch，同枱還有個男人，一餐飯傾足兩小時，然後由江華揸車，一行人到位於九龍灣億京中心的 Q2 Sound Studio。「個男人係唱片監製藝琛，江華搵朋友介紹約佢出嚟傾吓個女入行嘅計劃，順便試埋音。聽藝琛講，話天天把聲似莫文蔚幾特別，而且個人都幾有自信心。」
執衫試造型
試完音後，江華再揸車過海，到銅鑼灣陪女兒行街試衫執造型，麥潔文自認唔夠老公潮，有關形象全權交給江華操刀，兩公婆分工合作，打造囡囡做歌手。
只見天天想行入 Chocoolate睇衫，不過江華覺得太 casual，決定去行 i.t，其間，江華好有心機同天天一起研究，試衫試褲又試埋帽。
提一提江華，千祈咪將個女搞到好似成日冇換衫咁，唔該！
前 RB隊員
同江華一家三口食 lunch的唱片監製藝琛（鍾家俊），曾為麥浚龍、鄭伊健、關心妍、容祖兒等歌手作曲、編曲， 07年，藝琛與 6號、阿正、阿偉及泥鯭組成 RubberBand，簽約金牌娛樂，翌年推出首張專輯《 Apollo 18》，大受歡迎。由於壓力及健康問題， 10年他退隊重投幕後，並簽了 J.Arie（雷琛瑜）為旗下歌手，並引薦她加盟太陽娛樂。
星二代唔易做
星二代入行，雖然有父母光環照住，但星途未必順風順水，甚至會比其他新人壓力大，往往要花幾倍努力，才得到認同。
竇靖童（ Leah）
王菲與竇唯的女兒竇靖童承傳父母基因，音樂天分橫溢， 11年組樂隊並擔任主音，之後一年開始推出個人原創英文單曲《 With You》、《 On The Beach》、《 My Days》等，在網絡大受歡迎。 13年，童童新作《 Blue Flamingo》 iTunes上架，為入行試水溫。今年 8月，她參加在東京舉辦的《 New Sunny音樂會》，年底推出唱片的她，透露有意創作粵語及國語歌，正式入行。
黃芷晴（ Adrian）
黃日華女兒黃芷晴， 12年理工大學設計系畢業後，本來想開間小商店賣自家設計，當時適逢王維基搞港視，黃日華於是引薦女兒入行，父女檔上陣拍《開腦儆探》。早前黃芷晴獲監製鄧特希點名，在廣東電視台新劇《只有情永在》中擔正第一女主角，和男藝員陳堃合作。
龐景峰（ Andrew）
錢小豪及郭秀雲之子，在美國讀經濟的龐景峰，畢業後於當地銀行任職，一直想入行的他在偶然機會下，認識了韓國的音樂製作人，通過了徵選，正式成為練習生，經理人公司更請來美國電視劇演員 Becky Wu為 Andrew親自授課，先後在美國和韓國受訓兩年，今年 8月正式在韓國出道。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|