掃呢頁CODE去手機

2016年6月2日 星期四

韓國直擊拍攝地 尋找《太陽的後裔》 [壹週刊 - 1369] __,太陽的後裔,M1,

位於江原道太白市嘅韓寶碳礦,係神劇《太陽的後裔》嘅主要拍攝地之一,男女主角宋仲基同宋慧喬就喺廢墟中定情。外太空韓國直擊拍攝地 尋找《太陽的後裔》《太陽的後裔》令韓劇再次喺亞洲火熱起來,除咗帶挈劇中一班主角豬籠入水,仲打救埋韓國經濟!當地有調查指,本土經濟效益超過一萬億韓圜(約68億港幣),吸引超過十萬旅客訪韓,旺丁又旺財!既然去得韓國朝聖,梗係要去《太陽的後裔》嘅拍攝場地,尋找Oppa嘅足跡!劇中 ...


位於江原道太白市嘅韓寶碳礦,係神劇《太陽的後裔》嘅主要拍攝地之一,男女主角宋仲基同宋慧喬就喺廢墟中定情。

外太空

韓國直擊拍攝地 尋找《太陽的後裔》

《太陽的後裔》令韓劇再次喺亞洲火熱起來,除咗帶挈劇中一班主角豬籠入水,仲打救埋韓國經濟!當地有調查指,本土經濟效益超過一萬億韓圜(約 68億港幣),吸引超過十萬旅客訪韓,旺丁又旺財!

既然去得韓國朝聖,梗係要去《太陽的後裔》嘅拍攝場地,尋找 Oppa嘅足跡!劇中嘅虛擬國家烏魯克,除咗遠赴希臘取景,有一部分嘅場景於韓國江原道太白市搭景拍攝,重現地震現場!附近嘅三炭藝術礦場,同樣被借用作拍攝,各位《太陽》迷去韓國追星,唔好淨係去首爾,去遠啲先至稱得上係忠實 fans!

荒廢礦場變倒塌發電廠

《太陽的後裔》入面,宋仲基同宋慧喬一段動人嘅愛情,配合異國風情,特別令人心動。好多 fans都知佢哋定情嘅假想國家烏魯克於希臘取景,其實劇中嘅軍營、醫療基地等等,大部分於韓國江原道拍攝,劇組特別喺太白市嘅韓寶碳礦搭景,務求同希臘嘅場景連戲。

韓寶碳礦喺 2008年已經停用,本來呢度空無一物,只係剩番一幢荒廢嘅礦場辦公室,劇組睇中呢個地點,索性廢物利用,將屋頂打爛,再配合 CG效果,成為地震中倒塌嘅發電廠,再喺旁邊嘅空地搭建軍隊及醫療隊嘅營地,拍攝咗差不多三個月。

劇中發電廠喺地震中倒塌,其中好高嘅發電塔其實係 CG後期製作,據知為咗睇呢個景,當地旅客人數急升幾倍。

由首爾搭車去到太白,差唔多要三個鐘,當地嘅導遊表示,《太陽》係先拍後播,為免消息流出,上年拍攝嘅時候係高度機密,片場甚至係封鎖,一班主角就係長時間留喺呢個廢墟,非常辛苦。終於去到現場見到呢個景,雖然只係得番呢幢破舊嘅辦公室,不過作為 fans,依然覺得非常震撼。劇中嘅發電廠係以呢個實景及 CG造成,要認出呢個位一啲都唔難,好似宋仲基同晉久努力營救生還者嘅一幕;以及雙宋重逢綁鞋帶嘅一幕,全部都係喺呢度發生!負責人表示,由於上年 11月拍攝完畢之後,片場全部被拆卸,所以而家只係可以擺劇照及臨時場景喺度充撐,不過當地政府已經計劃原地重建場景,預計於 9月前建成,希望吸引更多遊客參觀,到時必定成為熱門景點!

雙宋喺地震現場重遇,宋仲基幫宋慧喬綁鞋帶呢一幕,打動劇迷嘅心,現場特別整咗個牌,話俾 fans知佢哋喺呢個位拍攝,可以解開鞋帶扮吓宋慧喬。

小道具都好有心思,呢對爛鞋就好似係劇中宋慧喬著過嗰一對, fans都要影。

《太陽》拍攝完之後,搭建嘅布景全部被拆卸,負責人話當初只係用嚟拍攝,其實唔係太穩固,所以唔可以保留,而家現場只係有幾張劇照。

碳礦放咗幾個白色嘅貨櫃,算係重現烏魯克醫療中心,現場仲好貼心有軍服同醫生袍,俾 fans穿著嚟影相。

黃蓮洞韓寶碳礦

地址:江原道太白市桶洞山 67-1

電話:+82-33-554-1388

交通:首爾清涼里火車站乘坐往東栢山站,約 3小時 40分鐘車程,下車後就看見「韓寶能量」的大廈,往大廈方向前往。

東大門重現定情廚房

唔想去到太白市咁遠,喺首爾一樣可以朝聖!位於東大門嘅 Doota免稅店,剛剛於 5月 20日開幕,搵嚟宋仲基做代言人,當然唔會放過吸客機會,舉行咗一個《太陽的後裔》特別展覽,最重要係免費㗎!展覽唔算好大,放咗幾張巨大嘅宋仲基劇照,俾 fans影相之外,仲重現劇中烏魯克軍營食堂嘅場景,雙宋定情嘅「紅酒之吻」嗰個廚房都完美呈現, fans們梗係要即刻坐低影相打卡!俾個貼士大家,呢度開到凌晨兩點,如果唔想同人逼,可以夜晚先過去慢慢影,行完再去東大門血拼就啱啱好喇!

位於東大門嘅特別展覽,將劇中幾個重要場景重現,呢個廚房連道具都跟足劇中擺設, fans都爭住企埋去影相。

另一個場景宋慧喬間屋,個人覺得呢一部分同劇集唔算好似,不過當行到攰坐吓都唔錯。

宋仲基同宋慧喬經常喺軍營門口促膝談心,今次特別搭番呢道大門布景,像真度好高。

展覽中最受歡迎係呢三張宋仲基嘅大海報, fans任何角度都可以影到 Oppa,不過好容易影到隔籬個 fans。

《太陽的後裔》特別展

地址:首爾市中區獎忠壇路東大門 Doota免稅店 D3區

日期:即日至 11月 20日

時間: 10:30am- 2:00am

費用:免費

網址: cn.dootadutyfree.com

交通:地鐵東大門歷史公園站 14號出口步行 3分鐘

藝術館變綁架現場

去完太白市嘅韓寶碳礦,順道可以去埋隔籬旌善郡嘅三炭藝術礦場,呢度都係《太陽》嘅取景地!仲記唔記得宋慧喬被奸角 Argus捉咗做人質,然後被佢軟禁?嗰個貌似地下室嘅地方,其實係藝術館嘅其中一個展廳!

以前韓國江原道煤礦業非常繁榮,不過隨着社會進步,開始式微,政府就將荒廢咗嘅礦山改建成文化藝術空間。三炭藝術礦場一共有四層,而用作拍攝嘅係 2樓礦場藝廊入面嘅工人沐浴間,出自一個德國設計師手筆,重現當年礦場工人嘅工作環境。由於藝術館嘅礦場環境,同劇中發電廠嘅環境有好多相似嘅地方,所以發電廠以及地震時嘅場景,有好多都係喺呢度拍攝。呢度仲有幾間客房,據負責人所講,宋仲基喺拍攝期間就係喺裡面休息,而家都變成景點之一!

三炭藝術礦場呢個工人沐浴間展廳,曾經喺《太陽》中出現,展廳中間仲放咗張櫈,又係用嚟俾 fans扮宋慧喬。

宋仲基喺地震中救援時受傷,被抬出嚟嘅時候同宋慧喬鬥嘴呢一幕,於藝術館一個舊廠房拍攝,不過建築物太殘舊,而家有意重建。

而家展廳會播放劇集主題曲、擺放劇照以及軍服, fans唔驚行錯。

當時劇組留喺藝術館拍攝,編劇金恩淑亦有到場,拍攝時遇上有需要修改嘅部分,立即喺辦公室重寫,宋仲基都要喺呢度傾劇本㗎!

三炭藝術礦場

地址:江原道旌善郡古汗邑咸白山路 1445-44

電話:+82-33-591-3001

休館:逢星期一休息(夏季旺季無公休)

門票:成人: 13,000韓圜(約$87港幣); 5歲以下小童免費

網址:http://samtanartmine.com/

交通:可於首爾清涼里火車站乘往古漢站火車,再轉乘市內巴士或的士前往

撰文:關錦雯

攝影、攝錄:張景然

鳴謝:韓國觀光公社


鍾意就快D Share啦!