探熱針
家中暈倒 消防破門救 李珊珊戒酒保命
被指為史上最好身材的 96年港姐冠軍李珊珊， 05年逐步退出娛樂圈，並絕跡公眾場合，感情和生活都極之神秘的她，最近傳出患腦癌並轉性向，當事人一概否認。但據了解，深居簡出的李珊珊腦內有個良性瘤，要經常出入醫院，去年十二月，更因頭痛引致胃抽筋暈倒在家，要消防破門入屋救人。
命仔緊要！有指李珊珊為全力同腦瘤對抗，食藥、運動、戒酒，三線進行。
良性腦瘤
大台重播《寵物情緣》，令近乎消失的李珊珊再現幕前，但同時被爆患腦癌。
據知，李珊珊的身體在四年前開始出現問題，除了濕疹皮膚病，還經常會頭痛，有時更會影響到個胃都痛埋一份，甚至出現胃抽筋。當時，醫生指她腦部有個瘤，幸好是良性，不是腦癌。
「濕疹對珊珊嚟講已經係個折磨，類固醇食得多，搞到佢肥腫難分，跟住仲發現腦有瘤，真係好大打擊！因為成日頭痛，仲影響埋個胃，周身病，個人情緒開始出問題，有抑鬱。舊年十二月初，佢胃抽筋，喺屋企 call白車，但救護車嚟到佢已經喺屋企暈咗，搞到要消防破門入屋救佢。」知情者透露。
瑪麗轉養和
消防入屋後，救護車送了李珊珊到瑪麗醫院。
「去到瑪麗醫院，珊珊已經有番知覺，仲叫咗人嚟睇佢，安排佢轉過去養和醫院，因為佢啲病歷喺晒嗰邊；喺養和住咗一晚後就出得院，嗰段時間係佢近呢年身體最差嘅時候。之後幾個月，珊珊都係食流質食物，本來今年三月買咗 VIP飛參加《 Taste of Hong Kong》（美食節），最後因為唔多舒服冇去。」
抑鬱症好番
據了解，李珊珊因為願意面對，反而令她的病情有進展。「呢四年幾搞到有抑鬱，係因為佢接受唔到，但近一年佢肯去面對，會聽醫生講，腦瘤唔係絕症，定期食藥又做帶氧運動，又將以前啲唔好嘅習慣例如飲酒，全部戒晒，身體都冇以前咁弱。
「開始嗰陣，啲痛症令佢好辛苦，頂唔順就去養和醫院打止痛針，又經常發燒，身體抵抗力好差，個人冇晒意志，好彩近年諗通咗，而家佢好積極，一步一步向前行。」知情者透露。
微博寫心情
絕跡娛樂圈，但李珊珊卻活躍於微博，差不多每日都會更新網誌，分享心情或為社會事發聲。
「佢成日都喺屋企，唔會出街，咁嘅狀況維持咗超過兩年。珊珊個社交圈子本來好廣，加上佢又鍾意睇波、睇賽車、飲酒，所以身邊朋友男比女多；但呢幾年收埋晒自己，就算朋友叫食飯、睇波，就連好朋友生日，佢都唔出去。
「除咗瞓覺，珊珊就係上網，佢呢幾年愛上寫嘢，無論係自己心情，或者社會嘅事都會寫，有時仲會同網民開火，好激進。」
病後斷六親
自從身體變差後，李珊珊已甚少返去荃灣老家，探老豆和外婆。「珊珊好錫阿婆，以前定時定候返荃灣探老人家，親戚活動都會出現，不過呢幾年身體唔好，佢都好少返屋企，過年、大時大節有聚會，都係得佢老豆出現做代表；不過啲親戚都好少問有關珊珊嘅嘢，好似斷晒來往咁。」知情者透露。
撰文、攝影、攝錄：娛樂組
|
鍾意就快D Share啦！
|
|
|
