Stephy同台灣有米 TB小牛搭上，絕情撇小方。
娛樂偵訊
當波女透明 重創方力申嚴重自閉
同 Stephy十年情話冇就冇，情敵仲要係女！被重創的方力申，一提起 Stephy就喊。事隔已兩個月，但最近為新戲《男神訓練營》埋位開工的小方，仍未收拾心情，繼續頹爆！
日前，劇組一連兩日在屯門黃金海岸拍沙灘戲，面對高海寧、張秀文、莊端兒三位「咪神」，加埋現場半百胸湧比堅尼女，小方依然毫無起色，匿埋自閉。
匿埋扮瞓
上週三（五月二十五日），小方、肥仔聰等晨早八點，已經去到屯門就位。場口是小方被五十個著住比堅尼的「肉女」圍住氹氹轉，但每拍完一個 shot，就見小方急急腳離開「肉女」堆，對身邊胸湧美景，眼尾都唔望。
不用埋位時，小方便將沙灘椅搬埋一邊，剝 Tee曬肌，選擇做孤獨精的他，放飯時被工作人員撩傾偈，但講不夠兩句，小方又掉頭走，甚至遠離拍攝場地，匿埋一邊閉目養神扮瞓。
終於拍完收工，準備離開的小方被其中一名比堅尼女追住影合照，他竟然扮聽唔到，但比堅女死跟，小方勉為其難停步同對方 selfie，但依然木無表情， cool爆。
第二日，外景隊繼續到沙灘開工，高海寧、張秀文無綫兩大「咪神」夾擊 35E莊端兒，全部比堅尼上陣，來勢「胸胸」，吸引不少「球迷」停低飽眼福。
著鮮紅色比堅尼的高 Ling先到場，等埋位時，高 Ling爭取時間，吩咐助手做攝影師，在海邊不停擺出誘人 pose，只見助手又踎低、又高炒，保證任何角度都有齊。
金剛 high晒
中午時分，輪到小方、金剛、陳國坤等男演員出場。三十度高溫，著住軍裝包到冚，個個熱到大汗疊熱汗，未埋位，化妝師已經不停動手補妝。
當日也是電影記者會，但小方繼續自閉，全程匿在劇組準備的帳篷內，直到夠鐘見記者，他才蒲頭，但一做完訪問，又拿拿臨閃走。
心情欠佳小方玩消失，但同場的金剛，見現場波光四射，拎住相機，行來行去四圍搵對象集郵，揀啱心水，就停低教埋比堅尼女擺 pose，勁 hyper！
撰文、攝影、攝錄：娛樂組
|
鍾意就快D Share啦！
|
|
|
