番禺
好多成名後的歌手都唔願走埠登台，怕危險又驚降呢，但事實證明唔係囉！
娛樂偵訊
靠跑場維生 趙學而刮清積蓄出碟
「每隔兩秒我都想起你……」 80後一定識趙學而的成名作《每隔兩秒》，儘管百聽不厭，但今日娛樂圈，實力與成就無法對等。冇同任何唱片公司簽約，過去十五年，趙學而一直靠自己積蓄，加上搏命返內地登台跑數賺人仔，先後自資出過四隻碟，每張揼本幾十萬，唔係講玩！
上週三（ 25/5），學而限量一千張獨立編號黑膠碟面世當日，她同時宣布「暫時唔玩住！」
香港零收入
後生一群，可能唔知道趙學而是唱家班，九○年代中是飛圖唱片一姐的她，作品《尋開心》、《我恨我是女人》至今仍是唱 K必點。飛圖被英皇收購，趙學而做了兩年英皇人，○一年宣告解約，隨後加入無綫做了幾年電視人，但再冇簽任何唱片公司。
冇公司掣肘，趙學而樂得開心！近年雖然甚少在香港幕前蒲頭，但卻不缺錢，因為多年來在內地跑夜場，汗水換人仔。
「大陸市場真係好大，每州每省不知有幾多呢啲夜場！只要你唔驚，一定有得撈。學而有知名度，唱嘅場都唔會好雜，加上佢夠經驗，又識得搞氣氛暖場；有啲真係聽都未聽過嘅地方，都會搵上門，長做長有！」知情者說。
對於被指一場酬勞有八萬，趙學而沒有正面回應。
「商業秘密呀！其實海鮮價，會因應市場需要調整。不過唔係我想唱幾場就有幾場，有時一個月一場，有時一星期一場，甚至一日可以幾場。視乎有冇客想要你。」趙學而說。
幾十萬小數目
不停努力吸人仔，要開飯更加為了音樂。由○八年開始，趙學而先後自資出過四隻碟，每次投資，至少幾十萬起跳，亦全靠有登台頂住，她才可以花錢娛己娛人。
「我喺香港已好少工作收入。第一張唱片，係用自己積蓄做，之後嗰幾隻（唱片），係用每張（唱片）賺返嚟嘅，再加登台賺嘅錢去做。做一張唱片其實唔容易，編曲、樂手、錄音室、混音師、版權費、包裝、運輸、廣告等等，有好多地方要用錢，但我做嘅量唔大，所以幾十萬已經算係小數目，當然，絕對唔可能同唱片公司比較。」
上週三（五月二十五日），趙學而推出限量一千張獨立編號黑膠碟，滿足一班黑膠發燒友後，她表示下半年時間，以登台為主。
「暫時未有計劃再做新專輯，因為之前出嗰四張（唱片），喺高質唱片界仍有發展空間。」趙學而說。
撰文、攝影、攝錄：娛樂組
|
鍾意就快D Share啦！
|
|
|
