熱爆娛樂: 借肚箍陳七　未婚妻 Toby爆粗鬧臭李綺雯 [壹週刊

2016年6月2日星期四

借肚箍陳七　未婚妻 Toby爆粗鬧臭李綺雯 [壹週刊 - 1369] __,Toby,陳七,李綺雯,梁靖琪,M1,

探熱針

借肚箍陳七　未婚妻 Toby爆粗鬧臭李綺雯

南華球星「陳七」陳肇麒， 14年在美國向𡃁模女友劉雅婷（ Toby）求婚成功，但卻一直未見他有註冊擺酒的實際行動，對婚事 hea爆，加上同前度李綺雯（𡃁妹）仍有聯絡，正印 Toby嬲到當面爆粗鬧𡃁妹，好火！

明知男友花心， Toby於是出絕招，努力「開工」，最終一索得男，搞掂陳七！

一索得男

風流「陳七」陳肇麒， 10年與組合 MVG成員劉雅婷（ Toby）拍拖期間，多次偷食斷正，就算兩年前在拉斯維加斯向女友求婚成功，但一直齋求唔結，遲遲唔願畫龜做老襯。

唔想夜長夢多， Toby一於生！最終「造人」成功，一索得男，經手陳七冇得走數。

「 Toby身邊唔少朋友都做咗媽咪，佢見人哋老公即刻轉晒性好黐家，於是有樣學樣，話生個 B出嚟等陳七定性啲，我哋仲教佢計住排卵期開工，估唔到轉過頭就中咗！

「 Toby有咗，陳七真係變得着緊好多，呢兩個月，唔使練波比賽就陪女友，每次做產檢更加陪實！雖然男友對自己好咗，但 Toby都有擔心，驚生埋仔陳七仲出去搞搞震，到時仲大鑊！」 Toby身邊人說。

一秒都不能鬆懈，佗住四個月肚的 Toby，繼續做跟得女友。上週四（五月二十六日）陳七到菲律賓完成亞協盃賽事後返港，大肚 Toby堅持去接機。一見面， Toby立即主動攬實。

上個禮拜，陳七到菲律賓完成賽事返港，出閘第一時間打電話向女友報到。

Toby一見男友就攬。

14年，在拉斯維加斯向女友 Toby求婚成功，但陳七拖到今時今日仲未完成手尾。

借醉開拖

雖然就做老豆，但對曾經拍拖的李綺雯（𡃁妹），陳七仍保持聯絡，男友同前度藕斷絲連，一直耿耿於懷。

今年初， Toby出席朋友婚禮，想到自己未婚夫求婚兩年都冇進一步行動，已經觸景傷情，加上同場撞見情敵， Toby火上心頭，竟然借醉對𡃁妹多次爆粗！

「一見到𡃁妹喺度， Toby已經㷫烚烚，嗰晚佢飲咗好多酒，臨散席嗰陣，仲專登行去𡃁妹身邊係咁爆粗，當時𡃁妹同朋友傾緊偈冇理佢，點知 Toby過咗陣又再行去𡃁妹嗰圍枱，又扮企唔穩撞佢，跟住仲大大聲講咗句『臭×』。𡃁妹都呆咗，睥咗 Toby一眼跟住自己行開，當時 Toby仲想繼續追住鬧，好在身邊有兩個朋友拉住佢！」知情人士說。