豪語錄
偽港女征韓記 Shin@As One
本地少女組合 As One的隊長叫 Shin，但遠赴韓國參加真人 show的，是吳思佳。
藝名是藝人的專利，爭崩頭想入行的，仍是鄰家女孩，要連名帶姓一起呼喚。
其餘一百位韓妹來自不同經理人公司，但未有自己的歌，希望藉比賽突圍而出。
相比之下， Shin在香港出道四年，出過碟，理應鶴立雞群。
評判問她訓練了多久，她說自己入行前沒有受訓，對方 O嘴，「『吓？冇受訓？咁你嚟做咩呀？』佢哋好愕然，我都好緊張。」
實情是，韓妹由小學開始發明星夢，上台一刻已經苦練十年八載。
唱歌、跳舞、單眼、飛吻，無一不是功夫。
「佢哋會對住塊鏡練表情，好似講故事咁：
我好鍾意你，你快啲過嚟啦。嘩，原來件事咁神奇？」
她大概沒有看過《霸王別姬》。
京劇藝人自幼苦練造手、關目、身段、唱腔，因受不住逼迫而自殺的，大有人在。
韓國如今算是回復古風。
「單眼唔可以輕輕力，要咇晒眼水、好大力先見到效果。
其實有少少痙攣，眼都合唔埋。」
Sugar vs Candy
據說 FFx那九百蚊 MV很搞笑。囡囡們荒腔走板、跳舞甩 beat，愈山寨愈有趣，忘了死茄喱啡都要讀《演員的自我修養》。 As One也拍過若干 MV，《 Candy Ball》標榜用韓國製作班底，但在市井流行的程度，一定不及同期發表的《 Sugar Baby》。吳思佳今年初去韓國參加《 Produce101》選秀，在彼邦粉絲傾力起底下，《 Candy Ball》在 YouTube上的點擊翻漲至一百三十多萬，但相比起《 Sugar Baby》的三百多萬，仍是小巫見大巫，「一二年剛出道時， As One好多人識，喺銅鑼灣、尖沙咀都好多人認得。唔知點解，時間過去，反而冇乜人認得我哋……所以要再努力啲。」
Shin的困局，也是我城青年的困局——想努力而無處着力。香港人鍾意嘲諷平庸，但世上總有人喜歡長腿纖腰吧？去到韓國，群雌粥粥，她發現自己的努力大幅貶值，「每次做完 show，睇番 playback，先發現自己真係同人哋爭咁遠。原來要做到好誇張，先見到效果。」賣萌亦要花氣力，「喺香港 training，冇話對住塊鏡勾引吓自己。對住自己做啲咁核突、咁 over嘅動作，係有啲尷尬。練到最尾，已經控制唔到表情，開始僵硬、抽筋。我究竟做緊乜嘢呢？」「攰，就繼續跳啦。你咁就叫練習？我睇你似係完全冇練過。係咪想唔出 show，直接被 foul走？啲老師真係會咁講。」經過四個月、朝六晚二的集中營生活，吳思佳最後排名廿三，不算失禮。「每次上台，我都覺得好似上咗身。好 free、發自內心咁笑，好自然咁單眼。因為喺台下練咗好多。」
真韓妹 vs偽港女
韓妹的努力也不只於日夜苦練。《 Produce101》的女孩很多都經過割捨修繕，單是這份狠勁，港女已瞠乎其後。 Shin自言害怕開刀見血，又介意別人懷疑她整容，「有次報紙寫我鼻樑有疤痕，其實只係暗瘡。我可唔可以澄清吓——」說罷指尖抵鼻尖，大大力往上推，看得我膽戰心驚，「高登啲人又話我對眼中間度可以擺張梳化！呢個係我聽過最 funny嘅 comment。可唔可以聽吓我唱歌、睇吓我跳舞，先 judge呢樣嘢呢？」高登仔講明 Your face， your fate嘛，「我唔係你心目中嗰種靚女，你覺得我對眼生得唔靚，但可能係特色呢？」如果換過一張臉才能爆紅呢？「我望住自己廿幾年，忽然變樣，我有少少接受唔到。」
Shin說自己正學習無視這些言論，「反而我媽咪好大反應：佢哋咁講，你係咪真係要整一整？」媽媽豁達，可能因為她也是半個韓妹。 Shin的韓國血統來自外婆，「啲人以為我天生識韓文，其實唔係。外婆好細個就去咗中國，講普通話。」父母早已離異，她自小跟做生意的媽媽漂泊，在北京、石家莊、深圳等城市住過，十四歲來港定居。但媽媽近年又返回大陸工作，「阿女，你夠唔夠錢使？一打嚟就係呢句。其實我唔係使好多錢，佢又以為我呃佢。」「有時佢問得太多次，我唔想佢太擔心。咁好啦，你俾錢我啦。」
大台 vs大舞台
媽媽有擔心的理由，「講真，收入真係唔多。做呢行都係為興趣。我好開心，屋企唔需要我養家。但如果可以賺到錢，就更好啦。」在香港，做藝人而賺大錢的，廿年來都是同一批人。而 Shin的韓妹朋友，早就不知港星為何物。「佢哋識嘅都係劉德華、郭富城嗰啲。入行咁耐都未見過劉德華，我都好想見吓佢！」與城城倒是有過一面之緣，因為教 As One跳舞的 Sunny Wong，正是他的排舞師。「有次喺 event， Sunny師傅同我哋介紹過。佢真係 keep得好好——」為了不想失禮師傅，幾個女仔特地排練了《狂野之城》的老舞，向長輩請安，「我而家都識跳㗎。」咁《雨中感嘆號》呢？「雨中……咩話？呢個唔識。」
Shin九四年出世，對四大天王沒有記憶。待 As One長大成人， K-pop才是她們的集體回憶。到時黎明要再開 4D演唱會，還是與劉華、城城一齊上《 Sunday靚聲王》？如果大台仍然健在。 As One也去過大台唱現場，「 TVB的員工都好認真。但可能香港冇乜女子組合，我哋啲歌節奏又快，佢哋捉鏡頭冇韓國咁準。我唱歌時，鏡頭會去咗其他人度。」效果跟她們在韓國的演出，就是不一樣，「成個 package都好靚，所有嘢都係度身訂造。好似《 Produce101》那個三角舞台，搭咗兩日，就係為咗一個 shot。」「每集的燈光、音樂都有少少變化，觀眾未必留意到，但我哋日日對住，都覺得好靚。點解燈光會變咗紫色㗎？所有嘢都好新奇。」好在韓國的電視台不吝嗇，所有片段都在 YouTube陳列，讓落後地區的觀眾去化緣。
疾風知小花
走筆至此， Facebook正被 FFx在麥花臣開 show的消息洗版。
四名十七至廿二歲的女孩對着三百觀眾、九成空凳唱足一晚，還自嘲：「我哋有乜嘢低潮未經歷過？」
這邊廂， Shin講起在韓國的經歷，也是一臉回味，「一啲都唔辛苦，因為我做緊自己鍾意嘅嘢。」忘卻每晚回到酒店，望着一個喼、一張床的孤寂，「最慘係冇得傾偈，其他我都 OK。」
「啱啱開始的一個月真係冇得瞓，個人都癲癲哋，情緒大起大落，成日都會打俾媽咪喊。但有時兩、三點先收工，佢都瞓咗啦。」
Shin能否出口轉內銷，或未可料。大家下次在街上遇見她，記住上前合照，「梗係可以啦， no problem！呢件係好開心嘅事。」
撰文：蔡慧敏
攝影：葉志明
攝錄：黃志明
髮型： Linfa@lL Colpo TST
化妝： Cyrus Lee
服裝： iiJin
|
鍾意就快D Share啦！
|
|
|
