娛樂偵訊
救《琅琊榜》 波比捱剪
范冰冰的《武則天》好收，無綫重施故技，再揼本買入在內地反應極佳的《琅琊榜》幫補收視，點知打錯算盤。
為了搶救收視和向廣告客戶交代，大台將原本 7月接力播、歐陽震華同視后胡定欣擔正的《一屋老友記》調前，並由九點半檔換成八時半；由於兩個時段的電視尺度有異，為免收投訴，劇中部分場口，必須剪走！
開壞個頭
收視插水，但去年外購劇《武則天》卻為無綫帶來最高三十七點收視，食過翻尋味，見由內地一線小生胡歌擔正的《琅琊榜》反應火紅，大台食指大動，即買！
為顧及香港觀眾節奏，大台將劇集由五十四集濃縮到四十六集。推出首週，因為劇情以交代人物出場為主，冇乜高潮，所以平均收視只有十九點，於九點半檔計，成績極差；即使之後以劇集導讀特輯硬銷，成效仍一般。
「呢套係男人劇，唔係後宮爭寵、一班女人過招嗰隻，班 C9點會睇得過癮吖，加上頭一個禮拜啲內容悶，冇追看性，但最主要係香港人識范冰冰，但唔識胡歌！」一名無綫人說。
福將留客
收視唔達標，廣告商詐型，見落力谷宣傳都冇幫助，大台高層決定變陣，希望借八點半時段的劇集，產生協同效應。
除了八點半新劇《純熟意外》提早本星期出街外，原安排《琅》劇後、九點半檔播的《一屋老友記》，亦調前並換檔緊接《純熟意外》推出。
礙於八點半與九點半時段的電視尺度有差異，《一》劇題材涉及鬼，所以須作出修剪，但時間倉促，劇組幕後都擔心新劇會被肢解，散晒！
「套劇有波比，佢係收視福將，公司諗住有佢，又有視后胡定欣，留到觀眾，睇埋之後套《琅琊榜》，但臨時臨急要剪過，實有甩漏，出街隨時俾網友捉到錯處，到時又要捱鬧！」劇組人員說。
出師不利
因為高層要變陣，令由李思捷、陳智燊主演的《爸 B有話兒》一而再，再而三押後，三度出街，都被迫讓路。
「本來係今個禮拜出街，但個時段俾咗《純熟意外》，而家話暫定擺喺《琅琊榜》之後，個劇俾人當垃圾咁掟來掟去，所以思捷都好冇癮！」一名無綫人說。
撰文、攝影、攝錄：娛樂組
|
鍾意就快D Share啦！
|
|
|