喺大台播咗已經有15集嘅大陸劇集《琅琊榜》，喺收視處於淡靜嘅情況下，一直處於劣勢，好似啲大陸傳媒咁講，呢套劇喺香港，竟然遇到「水土不服」嘅慘況。大台喺周一公佈上個禮拜嘅收視成績，平均收視終於跌穿20點，只有19.7點(約128萬人次收看)嘅成績，點知噚日收視仲見新低。第十五集嘅最低收視15.8點，平均收視16.2(105萬人次收看)，創下黃金時段外購劇最低收視紀錄。曾醒明回應傳媒查詢嗰陣話︰「第一點︰《琅》劇製作被內地稱為爆紅神劇，但始終喺收視睇到，香港觀眾偏愛收看TVB本地製作，第二點劇集人物背景錯綜複雜，觀眾錯失收睇一、兩集，便很難追上劇情發展較難投入；第三點每逢周三跑夜馬，TVB收視都會微跌。」不過咁落去都唔係辦法，據知呢套劇係由余高層同杜高層拍版買入，腰斬機會微乎其微，惟有安排催谷措施，而曾生都話：「劇集已播到第三星期，劇情漸進入高潮，公司決定作出突破編排，喺周六(4號)開始，每逢周六及周日每晚連播兩集，一氣呵成直至6月26日播出大結局，希望提升觀眾煲劇興趣，亦會加強宣傳。」
來源 source: http://hk.apple.nextmedia.com
|
鍾意就快D Share啦！
|
|
|