熱爆娛樂: 新年冧爆未來拿督外母　楊明又拖又扶莊思明媽 [壹週刊 - 1459

2018年2月22日星期四

新年冧爆未來拿督外母　楊明又拖又扶莊思明媽 [壹週刊 - 1459 - 生活] __,莊思明,楊明,思明,M1,

探熱針

新年冧爆未來拿督外母　楊明又拖又扶莊思明媽

楊明跟拿督女莊思明拍拖接近兩年，兩人經常放閃，更獲女友家姐莊思敏開綠燈支持，前年楊明飛大馬拜見女友父母，早已融入莊家。大年初二，未來外母返港過年，楊明孖女友帶她到淺水灣天后廟拜神，全程又拖又扶，未來外母猶如皇太后出巡，冧爆。

大讚乖仔

楊明跟莊思明一六年開始拍拖，大姑奶莊思敏公開大讚他好仔錫女友，拍拖未夠兩個月，楊明在吉隆坡拍外景，莊思明飛去探班兼順道帶男友見家長。

「阿楊（明）不嬲都好錫老人家， Lisa爹哋媽咪第一次見到佢，都已經好滿意，讚佢乖仔又有禮貌，阿楊同 Lisa一家關係好好，莊思敏都話佢對個妹好有耐性，所以好放心佢哋拍拖。 Lisa爹哋媽咪間唔中會嚟香港幾日，佢哋一定會見面食飯，見到個女同阿楊拍拖後咁開心，佢哋都好放心，當正佢係半個女婿。」身邊人透露。

楊明十分識做，落樓梯時，他又自動波扶實未來外母。

見未來外母背心外套不斷跌膊，楊明即細心為她整理。

拜完神，他們經過沙灘才折返餐廳，其間又攬又錫， so sweet。

未來外母到淺水灣天后廟拜觀音，楊明不單揸車接送，更不理旁人眼光，幫忙點香。

服侍周到

大年初二下午，難得拿督外母在港，楊明又唔使開工，他揸車載兩母女到淺水灣拜觀音。泊好車，一行三人先去餐廳歎咖啡，楊明沿路服侍周到，先幫未來外母整理背心外套，之後左手扶着未來外母，右手拖住女友，慢行到附近餐廳，原來大姑奶莊思敏早已經搵定位，在餐廳等他們。

小休一會，三人又出動，楊明拖住未來外母及女友到天后廟，見未來外母拿起三支大香，楊明二話不說幫手點火，之後再孖女友各自上香鞠躬，表現恭敬。

原來莊思敏早已經搵定位，在餐廳等他們一起歎下午茶。

16年，楊明拍電視劇《心理追兇》炒車被送入院，莊思明一直在醫院照顧男友。

楊明埋單

拜完觀音，不想讓未來外母跟莊思敏在餐廳久等，兩人經沙灘折返餐廳，其間忍唔住嘴了幾下。在餐廳再坐一會，楊明埋完單，送未來外母和莊思敏到停車場，他才跟女友二人世界，繼續在淺水灣拍拖行商場。

「阿楊同 Lisa拍拖之後，事業愈來愈順，今年初先攞過獎，雖然唔係咩大獎，不過入行咁多年，佢都冇試過攞獎，今年算係好特別，最重要係佢近年拍嘅劇都好有發揮，所以就算拍拖，對佢工作都冇影響，唔同以前，有拖拍就會分心唔集中。」身邊人透露。

今年在大台攞「飛躍進步男藝員」，由於事前未有預備，莊思明當晚外出買魚蛋燒賣替他慶祝，十分窩心。

儲錢結婚

莊思明向來篤信風水命理，有指楊明今年結婚機會大，婚後事業更暢旺：「就算冇相士呢番話，佢哋兩個早已經認定對方，不過阿楊一直拍劇好忙，兩個人又想儲多啲錢，所以未有時間表。 Lisa係少奶奶命，依家最緊張阿楊事業有發圍，佢話要等阿楊攞到視帝先結婚，就知佢幾想男友做出成績。」身邊人透露。

姊妹感情要好，莊思明同楊明開始拍拖，第一時間告知家姐莊思敏，未來大姑奶公開大讚楊明乖仔有耐性。

楊明跟莊思明同樣鍾意小朋友，揚言婚後要生兩個先夠數。

楊明近年備受大台力捧，早前跟伍允龍飛歐洲拍大製作電視劇《兄弟》。

楊明跟龔嘉欣合作電視劇《刀下留人》，雖然未孭正男一，但角色有發揮，更被讚演技有進步。

未來奶奶政策

楊明對未來外母必恭必敬，努力融入女友家中，其實向另一半家人埋手的，又豈止他呢！姚子羚和陳偉霆的外籍模特兒女友 Bruna同樣跟男友家人關係甚佳，行未來老爺奶奶政策。

陳偉霆女友

陳偉霆巴西籍索模女友 Bruna每次來港必陪男友家人，試過跟他全家齊齊出海玩。早前本刊亦直擊她跟陳偉霆的媽咪和家姐在淺水灣食 lunch，大家有講有笑。

姚子羚

姚子羚和男友「的士邦」鄭子邦拍拖多年，感情穩定，早在 16年她已跟男友舉家 14人組團歐遊，不但順利通過未來老爺奶奶嗰關，簡直已是半個新抱。

收成期

本月 27日便 36歲的楊明， 99年入行，初出道曾獲無綫力捧，在劇集《娛樂反斗星》中飾演雷霆（寸爆謝霆鋒），成為熱話。但他之後惹上官非，包括醉酒駕駛及刑事毀壞，一度入冷宮。 12年跟圈外女友 Joanna宣布結婚，但臨門被飛，愛情事業跌入谷底。

幸好近年在《守業者》、《收規華》、《心理追兇》等表現受注目， 6度獲提名大台「飛躍進步男藝員」，今年終於奪獎，自嘲「一把年紀才得獎」。隨着近年角色戲份愈來愈重，事業愛情兩得意，進入收成期。