一個身高6呎3，一個體重曾經超過300磅，58歲的車保羅，與比他年長兩歲的施介強（肥施）是一對活孖寶，90年代接戲接到手軟，除咗歷蘇主演嘅《香港也瘋狂》同《危情》等等之外，最令人深刻的當然是《審死官》中的瘦虎肥龍。去年初兩人一齊接受《蘋果》專訪笑談近況，今日突傳來肥施離世的消息。
車保羅今晚近九時接受《蘋果》電話訪問，傷心地謂：「今日收到朋友電話，叫我去伊利沙伯醫院見肥施最後一面，我好突然，唔知佢入咗醫院，我喺博愛做緊嘢去唔到，點知冇幾耐，張文慈就打電話比我，話肥施走咗。」
車保羅續說：「我好遺憾見唔到佢最後一面，好難過，佢係我好兄弟，我收咗線之後都忍唔住喊出嚟。」
張文慈當年同肥施合作亞視劇，她稱：「今日收到電話，話肥施唔得喇，叫大家去醫院見佢最後一面，我同尹天照去到，佢已經昏迷。佢今晚7點59分就走咗，屋企人喺佢身邊，佢好辛苦，屋企人決定同佢拔喉。」
肥施一路有糖尿病，年三十晚入醫院，情況一路好差，今日家人見其情況轉差，即急通知親友往探望。肥施後來於今晚8時左右離世，終年60歲。
來源 source: http://hk.entertainment.appledaily.com
|
鍾意就快D Share啦！
|
|
|