婚後太忙俾老公詐型，香香請足一個星期假陪老公返加國團年。
探熱針
捱到五勞七傷強強詐型香香請假返加國交人
16年岑麗香突然閃嫁金融才俊 Joshua（強強），做咗人妻一年有多，兩公婆一直心急想生 B，不過依然未有聲氣。
人哋就話嫁雞隨雞，不過強強就好體諒老婆，為咗香香放棄加國事業移居香港。升呢做人妻，香香嘅吸金力有增無減，劇接劇捱到五勞七傷，強強終於詐型。為咗安撫老公，今個農曆年香香請足七日假，陪老公返加國過年，做短暫賢妻。
老公詐型
婚後一直忙到冇停手，拍完《溏心風暴 3》，接住又開拍《果欄中的江湖大嫂》。香香劇接劇，仲要搞到五勞七傷，腰傷舊患惡化，難怪一向順得人嘅強強都詐型。
「唔只開劇，香香結婚之後又真係多咗好多 job，又廣告又出 function，咁香香覺得冇理由有錢唔搵，但 Joshua就唔想老婆咁操勞，同埋都結咗婚成年啦，都未有時間真正過吓二人世界。」香香身邊人透露。
細心拖實
老公有怨言，香香都即刻做番啲嘢！今個農曆新年，香香請足一個禮拜假，陪強強返加拿大交人。上週一（十二日），兩公婆現身機場準備出發。出發當日早上仍然要開工的香香，下晝三點半，急急腳跑住去 check in櫃位，原來強強一早已經 stand by，幫老婆辦好 check in手續。
本來面燶燶的香香，一見到老公即刻有番笑容，之後拿拿臨將行李寄艙。兩公婆一見面就開始雞啄唔斷，搞咗十五分鐘，準備入閘，香香原本一直跟住老公尾，但強強見閘口人多，驚老婆走失，細心拖實老婆。七日長假，強強真係要加把勁，隨時一擊即中！
撰文：娛樂組
攝影：楊紫、瀚鍾
來源 source: http://hk.next.nextmedia.com
|
鍾意就快D Share啦！
|
|
|