（Getty Images）
歐聯四強首回合爆發大戰，皇馬延續本屆作客強勢反勝拜仁，離三連霸又邁進一步！皇馬雖然首先落後，但繼後發揮勁旅本色，先有馬些路禁區邊窩利射入金球扳平，換邊後再有後備上陣嘅馬高阿辛斯奧奠定勝局，以2:1反勝贏波。繼16強、8強先後客場擊敗巴黎聖日耳門及祖雲達斯，皇馬一路演出極具說服力，次回合主場出擊，只要和波就出線。
今仗開波1分鐘唔夠，拜仁如狼似虎狂隊皇馬，羅拔利雲度夫斯基壓落左邊底線出波，湯馬士梅拿跑得稍前，未能把握入波機會。5分鐘主隊洛賓受傷，堤亞高艾簡達拿入替。17分鐘，艾斯高於進攻左路扭動蛇腰，起腳一射省中敵衞。之後丹尼爾卡華積趁對手禁區甩腳，快步一抽被撲出。
28分鐘拜仁打開紀錄，占士洛迪古斯於後場畀個靚助攻，甘美治大步推入禁區，窄角度起右腳狂抽入遠柱，拜仁打開紀錄。1分鐘之後羅拔仔入到禁區疑似被撞跌，但球證冇表示。拜仁之後有中堅謝路美保定傷埋，半場已用2個換人名額。
44分鐘皇馬追平，馬些路於禁區邊出左腳窩利射入，取得重要作客入球。之後拜仁狂攻，羅拔仔接應罰球一頂，但卻冇乜角度畀基羅拿華斯救到，跟手梅拿近門一頂又頂斜，上半場打成各一平手。
換邊後3分鐘，C朗禁區外起腳竟然大片，繼後雙方你一拳我一腳，51分鐘，列貝利於左路底線出波勁有威脅，如非華拉尼剔到個波，羅拔仔肯定射入。57分鐘皇馬反先，球隊大打反擊勁有效率，阿辛斯奧單刀射成2:1。71分鐘，C朗左腳勁抽入網，但佢攞波落嚟時手球在先，入波唔算，之後賓施馬殺入禁區冇人嘜勁射，但畀烏列治用腳救出。拜仁於完場前都有機會扳平，但羅拔仔近門一射以為入硬，點知竟然射斜，最後皇馬贏2:1，入決賽機會頗高。
來源 source: http://hk.on.cc
|
鍾意就快D Share啦！
|
|
|
