陳小春前年跟囝囝陳胤捷（Jasper）在內地真人騷《爸爸去哪兒5》晒父子情，可愛的Jasper完全融化了昔日火爆的小春。小春日前接受《蘋果》專訪，表示希望兒子透過體驗農村生活學懂珍惜身邊所有，他警惕教仔要收斂脾氣，為免兒子被社會「變咗一嚿叉燒」，更揚言會陪Jasper到外國升學。
撰文：余燕儀
攝影：葉君海
相關新聞：結婚十周年 恨紅館開騷
現年51歲的陳小春，前年帶着兒子Jasper到內地拍真人騷《爸爸去哪兒5》，他在第一集就黑面喝罵兒子行得慢，遭當時只得4歲的Jasper反問：「Can you stop angry now？」不慍不火的Jasper與小春有極大反差。小春於去年尾展開的巡迴演唱會，就是以囝囝名句「Stop Angry」作主題。
小春日前在尖沙嘴接受《蘋果》專訪，他坦言受兒子啟發：「呢個騷同監製度咗兩年，之後殺咗呢個節目出嚟，佢哋話不如用呢個主題做演唱會。」去年11月在成都舉行首站，Jasper只看了三分二，今個周六小春再於澳門開騷，他事先張揚會帶Jasper睇足全場：「今次澳門近，我諗佢應該走唔甩，去睇吓啦，睇吓爹哋平時做啲乜，未同佢上節目前，我成日出去做嘢，冇時間同佢相處。」
 昔日火爆的小春，有妻有兒後逐步收火，笑言現在已經變成一嚿番薯。 | 
|
跟住囝囝
貌似嚴父的小春，原來拒絕體罰，最怕是兒子對他說謊：「人始終都會講大話，但對父母唔可以，父母係最親，有乜事要同屋企人講。」對於兒子成長之路，小春甚為擔心：「香港幾百萬人，呢個社會有可能令你變咗一嚿叉燒。我已經同老婆講明，如果佢去第二度讀書，我都會跟埋去，我會離遠吊住佢。」
參加《爸爸去哪兒5》，正是小春防止兒子變成「叉燒」的第一步：「同佢一齊瞓，幫佢梳洗換衫，我都未試過。對佢都係一個比較好嘅經驗，原來呢個世界除咗香港，有啲地方生活條件唔好。我個仔能夠有機會去呢啲地方體驗生活，希望佢長大會珍惜，下下都話：『公公，我要食飯』、『婆婆，我要飲嘢。』」小春語畢不禁搖頭：「張開手攞碗飯，張開手攞嘢飲，唔得嘅！」
小春不諱言曾經望子成龍：「之前個仔喺老婆個肚入面，我想佢大個做醫生，幾叻呀，可以救人喎。」現時他只希望兒子均衡成長：「佢上個禮拜喺學校攞咗個獎，叫課外活動閱讀獎銅獎，佢平時好鍾意睇書，課外活動有彈鋼琴，彈得唔錯㖭，老師都話可以買琴畀佢。佢都有學小提琴，老師話佢拉得好好，good boy，呢種喜悅我唔識講。」
相關新聞：【男人心聲】歌詞慘情K場大熱
女幫人養
言傳不如身教，為做好「父親」這個角色，小春近年已逐步收火：「拍緊拖時見到狗仔會『着』，我會話：『唔好搞我，行開』結婚後，我同老婆睇戲，狗仔隊唔好掂到我就得，你有你做、我有我睇。𠵱家個仔出埋嚟，多一事不如少一事，變咗成嚿番薯。」小春還透露現正跟老婆努力追第二胎：「老婆就想要個女，咁對於我嚟講，我鍾意仔多啲，兩兄弟互相照應，女第時養大咗係嫁畀人，幫人養咋喎，其實到最後冇所謂，都係自己小朋友。」
場地提供：HEXA六公館
化妝：Yan Chiu of ndnco
髮型：Cliff Lam of Beijing Hair Culture
|
鍾意就快D Share啦！
|
|
|