憑電影《逆流大叔》，今年有份角逐金像獎最佳男配角嘅潘燦良，日前同女友蘇玉華出街醫肚，現場所見，單憑讀唇，就知蘇玉華講緊乜:「快啲啦，好肚餓呀。」
曾經係美女廚房冠軍嘅阿蘇，似乎對食無乜要求，反而佢嘅另一半潘燦良，喺餐廳門口要研究一輪個餐牌，而蘇玉華等到忟忟地嘅反應，就知佢已經餓到一個點，最後睇咗成分鐘，男友都係決定唔食呢間，唯有行快兩步，再搵過終於搵到個地方撐枱腳。嘩，阿蘇下下都大大啖放入口，就知佢剛才餓到發忟係可以理解。
食完飯，兩個行超市，女嘅負責揀，男嘅負責拎，分工清楚。
睇真啲，已經51歲嘅蘇玉華當日係全素顏，皮膚又白又firm，無懼零妝，絕對見得人。
而佢同潘燦良，曾經分手並各有所愛，男方前度係劉玉翠，女嘅就同唐寧前夫鄧偉傑拍過拖，感情喺舞台劇圈子兜兜轉轉，最後兩個都係揀番對方復合，直到今日。而且不時喺舞台劇，以情侶檔上陣，上年仲一齊攪「project roundabout」,推動本地舞台劇，佢地關係在公在私都係一對好拍檔。
來源 source: http://nextplus.nextmedia.com
|
鍾意就快D Share啦！
|
|
|