藝人湯怡、王浩信及徐榮今日現身荃灣商廈天台，為無綫劇集《極道怪咖》拍外景，戲中講述湯怡被飾演社團大佬的徐榮綁架，最後被綁吊於27層高的天台外，險象環生！拍攝綁吊戲前，一臉緊張的湯怡不停於天台上踱步，未幾，有數位工作人員上前幫她穿上安全衣以及繫緊安全帶，而她為確保安全都有再三確認是否綁緊。
待劇組人員一切準備就緒，正式開拍時出動兩部航拍機，湯怡戰戰兢兢行近天台邊緣，被吊出一刻不禁大叫幾聲，更高呼「好驚呀」，搞到身後工作人員都替她捏一把汗！整個被吊過程歷時大半小時，雖然湯怡於極度驚恐之下，但仍能拎出專業講對白及做足反應，靜心等候王浩信前來營救，而每次停機，工作人員都會即刻上前拉住湯怡埋欄邊稍作休息。
試戲驚到喊
湯怡完成被吊場口後受訪，驚魂未定的她自爆剛才已是第二次被吊，不過時間比第一次更長：「第一次吊咗大約5分鐘，吊之前我行埋去都未出，仲有成4格嘅距離，就腳軟、心跳勁快，忍唔住驚同喊，雖然只係試戲，但個心情係同戲中吊出去係一樣，喊咗出嚟！」
湯怡續指拍之前導演都有問過她是否畏高，曾試過於6、7層的唐樓拍攝跳樓戲的她自覺冇有怕：「佢問十幾樓得唔得，都OK嘅，但前兩日先知係廿幾樓，嗰時導演仲話係背住出面，我都OK，因為望天咩都唔知，係今日一嚟到！廿幾樓之餘仲係要望地下！（畀導演呃咗？今日愚人節！）係喎！佢今日都好少同我講嘢。」其後又笑言有追住導演「責問」為何真實情況與當初說法不一，但湯怡成功挑戰後都覺得好開心：「知係安全，但心跳勁快，工作人員抱住我好有安全感，但一放手就好想喊，就好似準備好要跳落去嘅感覺，離心力好大，拍完依家都好攰。」
兩日冇沖涼
問到吊出去一刻腦海想甚麼？她坦言是屋企人：「真㗎！大吉利是講，如果真係有咩意外點算？（有冇買定保險？寫定平安紙？）相信TVB有幫我買重保險嘅，我依定個人都仲未定！」問拍TVB劇集會否覺得辛苦？她表示開拍前有好多有經驗的人講過大概拍攝狀況，自己都做定心理準備，但開拍後又未至於想像中般辛苦，惟自爆破極限兩日冇沖涼：「好開心，一開心時間就過得好快，係要爭取時間休息，試過兩日連住開工冇沖涼，冇落妝就瞓，自己有潔癖都跨越咗！不過我只係瞓梳化，冇瞓落床。（最短試過瞓幾多個鐘？）個幾鐘，如果要落埋妝就冇時間，咁不如直接瞓，但如果好幾日都係咁就吃力啲，兩日都OK。」
|
鍾意就快D Share啦！
|
|
|