自從反送中運動在今年6月在各區遍地開花，持續多月的示威活動，爆發一次比一次激烈的警民衝突，示威抗爭至今已逾2,000人被捕，更有1名中五學生被警員以實彈零距離開槍射心口事，事件觸發示威者對警方不滿達至新高點！一向敢言的杜汶澤今日凌晨在facebook撰寫了一篇叫《我居然叫人唔好鬧人》的長文，他坦言希望大家不要再近距離以言語挑釁警察，真心希望為大家好，可以：「俾面我、睇咗佢！」
阿澤說：「首先，成件事已經發生咗差唔多四個月，警民關係已經無可挽回，唔使研究。好多時候一啲衝突根本係同抗爭未必有直接關係，純粹係仇人見面。唔緊要，我知道大家冇可能原諒香港警察，我絕對理解，但係你哋要明白到，你哋面對嘅究竟係一種咩物種。好簡單問大家一個問題，你會唔會去當差吖？如果你會你已經去咗啦係咪？咁既然你唔會，亦即係表示大家係非常之唔同嘅人。咁既然大家係好唔同嘅人，又點可能要求對方理解你呢？所以每一次我見到有啲好心市民，喺前線同警察講道理，我自己都會搖頭嘆息。唉，同佢講都嘥口水。」
「其實我喺節目入邊亦都講過，走去當差嘅人，有極少數係因為出於正義，但係入行後，就會發現整個警隊，其實都只不過係個擦鞋仔集團，擦鞋越叻就越升得快，咩正義感都消磨晒所以好容易會變得好負面，佢哋會增肥，爛賭，甚至作奸犯科。君不見警察犯罪個案有如天上繁星？亦都有好多係因為求學時期經常被欺凌，返學比人打，又冇跟大佬，自己又唔揪得，畢咗業咪去考差人囉。一般被暴力對待過嘅人，暴力傾向都特別嚴重。」
「第三種而我亦相信係最大部份嘅一群，就係純粹打份工。呢班人同工廠入邊嘅機器、或者黨鐵入邊嘅入閘機基本上冇乜分別。上級叫你做乜你咪做乜囉，根本冇個人意志可言。咁仲有冇好差人？有！不過有都唔敢企出嚟咁你哋自己諗下啦，畀呢三種人揸住武器，係幾x恐怖嘅一件事。何必要得罪呢啲咁嘅人呢？所以每一次我見到差人都好有禮貌，儍仔威喺條街度畀你攞晒又點話，有幾多人見到啫？返到屋企我自己嘆冷氣食牛扒。我相信大家對於差人嘅觀念，其實係來自細個睇電視劇或者電影，我可以好負責任咁話畀大家知，呢啲全部都係角色嚟，係編劇寫出嚟，如果寫得唔好，梁朝偉都唔會接至於警察嘅禮貌方面，大家就更加唔應該咁執着，因為佢哋由警察學堂開始，已經日日畀人喝，畢咗業入咗警隊工作，又比上司喝，所以佢哋同人講嘢，淨係識得喝生晒。大家亦都留意到，好多高級警務人員，當面對市民嘅時候，除咗冇禮貌之外，仲有一副高高在上嘅樣，咁好容易理解啫，因為日日喺差館畀人擦鞋，其實接觸市民嘅機會唔係真係咁多，當遇見市民嘅時候，好容易會誤會對方係佢自己下屬，再加上自己膊頭有花，自不然覺得自己喺職場上有啲成就，個人囂張啲都係好合理。其實咪搵得嗰十雞八雞個月，嚇死人咩想。」
最後阿澤說：「所以我希望大家要明白，今時今日有極權撐腰嘅香港警察，可以講得上係為所欲為，你頂撞佢，輕則佢會xx你，用胡椒噴霧射你，重則開槍打x你，打你唔死拉埋你。完全係唔需要負上任何責任！留有用之身，做要做的事。老人家心痛你哋，一時感觸多口了，請年輕人恕罪。」
有不少網民留言表示認同阿澤的說法，梁芷珊留言表示：「7個字：好漢不吃眼前虧，何況呢個眼前虧，陀住槍，棍都有幾款，有噴霧，仲未必着制服。」阿澤亦回覆：「米芝蓮個friend ...『咪蝕桌』。」
| （facebook 截圖） | | |
|
鍾意就快D Share啦！
|
|
|