無綫無情，人間有情。
48歲的林子博，過去11年在無綫娛樂新聞台做主播，偶爾有機會參與劇集和綜藝節目，跟太太Shirley公一份婆一份，一家四口生活雖不富裕，但知足。
數個月前，這個幸福之家起了重大變化，跟子博結婚16年的Shirley，忽然患上極罕有癌症「平滑肌肉瘤（腹腔）」，不但進入第四期，癌細胞更擴散到肝、胰、肺及淋巴。Shirley為抗癌而辭去原來工作，子博一個人孭起整頭家，勉勉強強以為撐得住，卻沒想到無綫決定本月1日約滿後不再跟他續約，連家中唯一經濟支柱也倒下來。
不過，一隻「無情雞」換來一班「有情人」，古天樂、汪明荃、鄭秀文、張衞健、薛家燕、鮑起靜、江美儀、張慧儀…Z難子博相熟的、不相熟的，一個個伸出援手，有些經濟上支持，助Shirley到美國就醫，有些給他介紹工作，比起乜乜大型籌款節目，來得更真實、更真心。
子博日前接受《蘋果》專訪時由衷感激說：「我呢11年喺娛樂新聞台係冇白過，因為真係有好多呢一行嘅人，你諗都諗唔到，我只不過訪問過2次、3次，真係冇電話冇交情，但佢哋都有幫我，好似大帥哥張衞健，佢搵我電話WhatsApp我，有好多鼓勵嘅說話同我講，甚至乎佢留言畀我太太，我太太聽完之後喊咗出嚟。佢話：『你要頂住呀，你一定會好番㗎，大帥哥會撐你呀！』」至於ViuTV方面亦已招手，正如子博所講，天無絕人之路。
曾經有傳子博因為在社交網發表過黃絲言論才不獲無綫續約，子博亦已否認此說法，強調自己講子女講民生居多。究竟，他有否向公司了解過「真正死因」？
「冇問，因為你問都好似幫唔到件事。我個人遇到問題唔會鑽牛角尖諗返件事點解會發生，我淨係諗個解決方法，當我遇到呢個問題，我第一時間諗：『我點樣同老婆講呢？』我淨係諗點樣去安撫我太太嘅情緒。」
Shirley聽到子博失業後曾經爆喊，直至看到無數支持打氣留言，心情已平復下來。子博說：「我不停同佢講唔需要擔心，我又唔係冇手冇腳，你返唔到工啫，我仲返到工㗎嘛，最緊要有條命、有健康。加上呢幾日好多（網民）留言，我老婆都有睇，好多人都係一面倒撐我，老婆睇完之後舒服咗好多，釋懷咗。」
自己可有為被無綫離棄流過一滴淚？
「有㗎！自從公司講唔同我續約之後，我一路都OK嘅，係唔開心，但冇話好激動或者喊，點解呢？因為我經歷過，我以前喺亞視都係咁，我做咗9年，突然間話唔同我續約，我企咗喺度，之前嗰一年我本來2萬蚊人工，跟住減到萬二蚊，同我續一年，跟住之後嗰一年即刻話唔同我續約，因為佢已經減咗我人工，變咗我長期服務金少咗好多，嗰一刻我打擊仲大。跟住入咗東亞衛視，做咗5年，最後執笠，跟住又冇嘢做。」亞視年代他還因為失業而無能力供樓，要將樓賣掉。子博續說：「東家唔打打西家，冇一間公司係養你一世，所以我睇得好化。雖然我冇刻意去嬲TVB，但當有啲畫面喺我面前出現嘅時候，我就會好嬲TVB，就係我睇住老婆攬住個廁所嘔，因為化療藥啲副作用好勁，我望住佢攬住個廁所嘔嗰陣，我幫佢唔到，喺嗰一刻我就會諗：『TVB你做乜喺呢個時間搞我？你畀我過咗呢關先』但到我老婆一冇嘢時，我冇再諗呢啲。」
無數網民鬧爆大台冷血無情，子博又有另一番睇法。「我唔係幫TVB講嘢，正如我頭先講過，我經歷過太多嘢，公司手起刀落嘅情況，只不過呢段時間我咁唔好彩，因為屋企有事，如果我屋企冇事，我覺得個結局其實係一樣，啲人就覺得點解喺呢個時候你仲要搞佢呀？我冇諗太多，我淨係覺得佢真係一間公司，佢唔係一個慈善機構，唔係一個社企，可能佢都有佢嘅難處，大家都知道佢而家比較少廣告，可能又加埋呢個社會氣候，令到佢哋都有呢個壓力，我唔係刻意幫佢諗，只不過令到我自己好過啲啫。」
Shirley現於東區醫院做化療，但頭兩次在浸會做化療，已花掉兩公婆積蓄七七八八，面對屋租和一家人生活費，失業的他又如何應付？子博滿樂觀說：「我自己都有個心理準備唔知幾時搵到工，我假設兩、三個月，咪使埋部份積蓄咁囉，又唔係諗到咁絕望，我會做part time，因為報道出街之後，真係有人搵我做活動MC。」
子博10歲囝囝卓楠，擔心媽咪知道爹哋失業後影響病情，天真到建議爹哋「扮返工」瞞媽咪，至於14歲大女詠渝，亦主動說做兼職幫補家計。子博自豪的說：「我對仔女其實好生性，自從我老婆病之後，我對仔女喺屋企嗌交係嗌少咗，聽話咗，自動自覺做功課。我冇喺TVB做，我個仔第一時間話：『爹哋嚟緊唔使畀零用錢我㗎喇。』阿女呢，佢第一時間話要做part time，我話爹哋好快搵到嘢做嘅，你畀心機讀書已經夠，我唔使你好成績，畀我見到你兩隻嘢乖乖地溫書，爹哋媽咪都已經好安慰。」
今次可算是人生最大打擊？子博苦笑：「我希望係！唔好再嚟喇！」
採訪：戴彩煥
攝影：沈健程
攝錄：馮嘉銘、葉君海
場地：BARON 99
|
鍾意就快D Share啦！
|
|
|