被無綫力捧的張振朗冧爆32D咪神女友楊偲泳，但大台對這段戀情有意見喎！皆因楊偲泳是ViuTV新人，既是對家藝員，知名度又比大台親生仔張振朗低，方丈覺得唔著數囉！
32歲張振朗去年跟26歲楊偲泳（Renci）撻著兼火速認愛，一度令大台有微言。「公司覺得個女仔唔多人識，又唔係自己人，唔想張振朗個名同佢扯上關係，落order要佢盡量低調。」無綫中人透露。
飯碗要緊，張振朗自然高度配合，早前兩人去日本旅行，也只敢各自上載同一個電話亭拍攝的單人照。
日前跟Renci拍拖，也特地找來胞兄一家人做電燈膽，小心行事。
張振朗跟兩名姪兒一向老友鬼鬼，沒料跟他拍拖只有大半年的Renci，跟兩名姪兒已經玩得很投入，打成一片，關係非常好，有如半個自己人一樣。
當日他們刻意前後腳而行，但張振朗不時偷望女友，冧樣現形。有時二人亦忍不住走在一起說俏俏話，相當甜蜜！ 雖然公司下令要低調處理戀情，但愈打壓愈愛，二人早已見過雙方家長。
張振朗試過一時口快，坦認最愛幫女友吹頭髮，「平時看到她洗完頭，一大把頭髮濕晒覺得好辛苦，我就好喜歡幫她吹乾頭髮。」有自爆同居之嫌。
過去張振朗一直黑氣纏身，17年平安夜「天降帳篷」，去年11月台慶「天降錄影機」，兩次均令他受傷收場；加上拍《包青天》四次墮馬，最傷人的是劇集出街時，相關騎馬場口全數被剪掉。
低處未算底，最慘烈的是當主角的《堅離地愛堅離地》，受「安心事件」的黃心穎拖累變倉底貨。另一套《機場特警》，因為社會氣氛問題，推出無期，難怪網民封他為「地獄黑仔王」。
但跟Renci拍拖後，慢慢也交上好運。去年底《萬千星輝頒獎典禮2019》首度開齋，獲得「飛躍進步男藝員」。
雖然女友被大台嫌棄，但張振朗大讚她：「細心、人品都幾好，我好愛我屋企人，佢都對屋企人幾好，我真係好欣賞。我拍拖都會想將來，會想結婚，所以好認真看待，大家感情暫時都好穩定，佢都陪伴我黑仔期一段時間，我覺得做呢一行係辛苦，身邊有個伴能同你分享生活，分享喜與悲，呢方面佢做得很好，大家亦會互相扶持。」
遇上Renci前，張振朗跟拍拖五年多的藝人陳芷尤，性格不合而分手，療傷一年。
「分手之後都差不多一年時間去平復，真係好唔開心，好傷心。」張振朗說。
走過傷心的日子，如今張振朗感情有著落，事業見曙光，終於可以去掉「地獄黑仔王」這個稱號，Renci真的功不可沒！ -----------------------------
【壹週刊直播平台 ChannelNEXT】
立即睇
全城抗暴 區區論壇同你深度剖析
-----------------------------
【升級壹會員登記站 為你解疑難！】
親臨旺角、銅鑼灣做升級壹會員，即送「香港人：抗爭之夏」限量明信片
詳情地址
來源 source: http://nextplus.nextmedia.com
|
鍾意就快D Share啦！
|
|
|
