48歲的江美儀是廣告模特兒出身，入行28年，最近因劇集《殺手》及烹飪節目《女人必學100道菜》雄霸大台黃金時段兩線節目。江美儀在1997年開始為亞視拍劇，2009年轉投TVB後事業露曙光，2013年憑《衝上雲宵2》摘下台慶頒獎禮最佳女配角，演技備受肯定，繼而再於2017年《親親我好媽》首當女主角。
江美儀接受商台《1圈圈星光背後》訪問，對於為何2007年約滿亞視要等兩年才能跳槽大台，江美儀首度披露全因吳君如一句說話之助，她說：「人哋要你先得嘛？事隔多年先爆單料你知，如果唔係吳君如，我根本入唔到TVB，真嘅！當時TVB想君如再開《星星同學會》，君如同對方講：『你公司都唔夠人用咩？江美儀你哋要唔要？』就是因為君如講咗呢一句，又想佢開《星星同學會》，樂小姐之後就簽咗我。當年合約條件係唔好，兩年一個騷，係好平好平，但冇辦法。」
兩年前，江美儀宣布同吳君如弟弟吳君祥（Vincent）結束11年情，但最令外界震驚的是，事後立即被傳媒踢爆她跟吳君祥其實早於2006年已經在美國西雅圖秘密註冊，吳君如幫江美儀簽TVB實是幫弟婦。對於為何一直隱瞞已婚真相，江美儀解釋：「做我哋呢一行生活好透明，太多事唔容易自己話事，我唯一可以守，就係呢個秘密，係好低能。最初係我哋協商好，就係唔想講，一直想保持呢個秘密。」拍拖一年便結婚，是否太衝動？她說：「其實我哋一齊幾個月就結婚，但唔係衝動，Vincent呢個男人好好，唔係一個壞人，我亦覺女人點都要嫁一次，佢亦好照顧我。只不過到後期，大家步伐唔一致，發生很多事，但絕唔涉及第三者，佢多數喺內地工作，我哋聚少離多亦有關，只可以講大家太注重於事業上。大家都有努力挽救過，最後我哋坐低傾，覺得分開會令大家開心啲。我都冇諗過最後會有人查到啲咁confidential嘅事，哈！係天網恢恢。」
對於自己是否屬於太強勢女性，導致婚姻觸礁，江美儀說：「我都想做弱者，我份人率真，唔會扮弱，我真係要養家，真係要喺事業上衝同闖嘛。」兩年前回復單身的江美儀坦言現在對婚姻再沒有憧憬，「我試過婚姻，唔使再試喇。但如果有個伴都好，但可遇不可求。」
----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：
iOS/Android
來源 source: http://hk.appledaily.com
|
鍾意就快D Share啦！
|
|
|